Бүгінде Үржар ауданының даму қарқыны жоғары, даңғылы айқын. Осы орайда жуырда Жарма ауданында өткен аймақтық Ауыл шаруашылығы еңбеккерлерінің күнінде аудан әкімі Серік Зайнулдиннің облыс әкімі Даниал Ахметовтің арнайы Құрмет грамотасымен марапатталғанын да айта кету ләзім. Ел әлеуетін еселейтін салаға қосқан ерекше үлесі үшін берілген аймақ басшысының бұл арнайы марапаты, сөз жоқ, Серік Зинабекұлының аталмыш өңірді дамытудағы ерен еңбегіне берілген айрықша баға, Елбасы тапсырмаларын орындаудағы қызметінің жоғары өлшемі екені анық.
1 желтоқсан – Қазақстан Республикасының Тұңғыш Президенті күнін мерекелеу шаралары Үржар ауданында кең көлемде басталып кетті. Елбасы, Ұлт Көшбасшысы Н.Ә.Назарбаевтың қайраткерлік қырын бейнелейтін, Президентіміздің ел Тәуелсіздігі жолындағы қарышты қадамын танымдық тұрғыда әспеттейтін түрлі іс-шаралар әсіресе білім ордаларында, мәдени нысандарда көптеп өткізілуде.
Осы орайда аудан әкімі, руханият пен мәдениет салаларының жанашыры Серік Зайнулдиннің қолдауымен қолға алынған ҚР Тұңғыш Президентінің күнін мерекелеуге арналған он күндік акция Үржар ауданы бойынша қарқынды түрде жүріп жатыр. Жуырда аталмыш патриоттық акцияның негізгі өзегі саналар «Еңселі елден — Елбасыға» тақырыбындағы іргелі жиын Үржар ауданының мәдениет үйінде болып өтті.
Шараға Үржар ауданы әкімінің орынбасары Құсайын Сейітқанов, аудандағы барлық мекемелер мен бөлімдер және баспасөз өкілдері қатысты. Сонымен қатар, жергілікті мемлекеттік қызметшілер, мұғалімдер мен жастар қатары да мол жиналды.
Салтанатты жиында алғашқы құттықтау сөз алған аудан әкімінің орынбасары Құсайын Бейсенұлы мемлекетіміздің қалыптасуы және дамуы жолындағы Елбасының ерен еңбегі, әлемдік саясаттағы көшбасшылығы жайлы кеңінен тоқталып өтті.
— Биыл Тұңғыш Президент күні мерекесін біздің аудан халқы айтарлықтай жетістіктерменен қарсы алып отыр. Құрметті жерлестер, қадірменді ағайын! Қазіргі таңда ортақ Отанымыз — Қазақстанымызды күллі әлем мойындайды. Найзаның ұшы, білектің күшімен ата-бабадан қал-ған елімізді басқарып келе жатқан Н.Назарбаев қазақ елінің туын көкке көтеріп, әлем танымастай етіп өзгертті. Елімізде бұл мерекенің тарихи маңызы орасан зор екені айдан анық. Бұл күннің барша отандастарымыз үшін мән-мағынасы ерекше, — дей келе үржарлықтарды осынау асқақ мерекелерімен құттықтады.
Ал, Үржар төрін мерекелік көңіл-күйге бөлеген салтанатты шара аудандық Мәдениет үйі өнерпаздарының әуезді әні мен әсем билерімен жалғасын тауып, өңір бойынша асқақ мерекенің бастау алғанын паш етті.
