Семей қаласы әкімдігінде Шығыс Қазақстан облысы жұмыспен қамту және әлеуметтік бағдарламаларды үйлестіру басқармасының ұйымдастыруымен Мемлекет басшысы Н. Назарбаевтың бастамасымен құрылған «Атом» жобасын жүзеге асыру бойынша атқарылған жұмыстар мен жоспарлары талқыланған дөңгелек үстел өтті. Басқосуда, негізінен, Семей ядролық сынақ полигонынан зардап шеккен азаматтарды әлеуметтік қолдау мен медициналық қызмет көрсету барысы талқыланды.
Жиынға Семей қаласы әкімінің орынбасары Надежда Шарова, ҚР Денсаулық сақтау және әлеуметтік даму министрлігінің әлеуметтік көмек департаментінің директоры Арман Өмірбаев, Радиациялық медицина және экология ғылыми-зерттеу институты директорының клиникалық жұмыс жөніндегі орынбасары Талғат Молдағалиев, Еңбек, әлеуметтік қорғау және көші-қон комитетінің Шығыс Қазақстан облысы бойынша департаменті басшысының орынбасары Марина Шаронова, және өзге де қоғамдық ұйымдар мен бірлестіктердің өкілдері қатысты.
{jcomments on}2012 жылы 29 тамызда Мемлекет басшысы Н. Назарбаевтың бастамасымен «Атом» жобасы құрылып, оны жүзеге асыру бойынша бірқатар жұмыстар атқарылды. Ядролық қарусыз әлем — ол Қазақстанның мақсаты. «Атом» жобасы осы идеяны жүзеге асыруға бағытталған. Аталған жобада Семей сынақ полигонындағы ядролық жарылыстардан зардап шеккендерді әлеуметтік қорғау бойынша іс-шараларды жетілдіре түсуге ерекше көңіл бөлінген. Бұл ретте радиациялық медицина және экология ғылыми-зерттеу институты жарылыстардың медициналық және радиоэкологиялық салдарын анықтауда түрлі зерттеу жұмыстарын да жүргізуде. Дөңгелек үстелде ҚР Денсаулық сақтау және әлеуметтік даму министрлігінің өкілдері азаматтарды әлеуметтік қорғау бойынша атқарылған жұмыстар жөнінде есеп берді. ҚР Денсаулық сақтау және әлеуметтік даму министрлігінің әлеуметтік көмек департаментінің директоры Арман Өмірбаевтің айтуынша, бүгінде сынақтардан зардап шеккен 290 мың 405 адам еңбекақыларына қосымша үстеме ақы алып отыр. Жыл басынан бері осы санаттағы 194 адам баспанаға қол жеткізген. Сондай ақ еліміздің БҰҰ-ның «Мүгедектердің құқықтары туралы» конвенциясын ратификациялауы да өз жемісін беруде.
— Қазақстан ТМД елдері арасында «Арнайы әлеуметтік қызметтер туралы» заңды бірінші болып қабылдады. Осыған орай қызмет көрсетудің стандарттары енгізілді. Еліміздің 14 өңірінде мүмкіндігі шектеулі жандарға арналған 47 күндізгі бөлімше ашылды. Өткен жылы аталған бөлімшелер екі мың адамға әлеуметтік қызмет көрсетті. Нәтижесінде балалар үйі мен интернаттардан 492 бала отбасыларына оралды. Жарымжан балаларын күндізгі бөлімшелерге қалдыруға мүмкіндік алған 600-ге жуық ата-ана жұмысқа орналасты, — деді ҚР Денсаулық сақтау және әлеуметтік даму министрлігінің әлеуметтік көмек департаментінің директоры Арман Өмірбаев.
Асан МЫРЗАХАН, «Семей таңы»
