Семейдің әлеуметтік сала қызметкерлері ыммен сөйлесу курсынан өтті. Мүмкіндігі шектеулі азаматтармен еркін сөйлесіп, сапалы қызмет көрсетуге мүмкіндік беретін ымдап сөйлесу курсын қалалық жұмыспен қамту және әлеуметтік бағдарламалар бөлімі БҰҰ Даму бағдарламасының қолдауымен жүзеге асырған.
Арнайы курсқа Семей мен Өскемен қалаларының медициналық-әлеуметтік мекемесі мен Халыққа қызмет көрсету орталықтарының 45 қызметкері қатысып, үш ай бойы тегін оқып шығыпты. Жобаға қатысқан қос шаһардың мамандары оқуларына аса жауапкершілікпен және ерекше ынтамен көңіл аударған. Ендігі кезекте олар нашар еститін азаматтармен ым-ишара арқылы еркін сөйлесіп, қажетті көмек көрсете алатын болады. Курсты аяқтап шыққан сала мамандарына сертификаттар 3 желтоқсан — Халық-аралық мүгедектер күніне орай берілді. Шара барысында алғаш рет Қазақстан Республикасының Мемлекеттік Әнұраны ыммен орындалды.
Айта кетуіміз керек, шетелдерде нашар еститіндермен арнайы айналысатын қызмет бар, олар мүгедек жандарға кез келген жағдайда көмек көрсетеді екен. Ал елімізде сурдо аудармашылар әзірге тым аз болып отыр. Тек Шығыс Қазақстан облысында ғана 58 мыңнан астам мүмкіндігі шектеулі жан тұратын болса, олардың жартысынан астамы нашар еститіндер.
— Ағымдағы жылы Қазақстанда мүгедектердің құқығы бойынша конвенция ратификацияланды. Бұл мүгедек жандарға қажетті инфрақұрылымдарды, сапалы білім мен еңбекке орналастыру мәселелерін шешуді жіті назарға алуды міндеттейді, — дейді ШҚО БҰҰ Даму бағдарламасының менеджері Рауан Қалиев. – Егер өңіріміздегі облыстық медициналық-әлеуметтік мекеме мен Халыққа қызмет көрсету орталықтарының қызметкерлері ыммен сөйлеудің базалық негізін білетін болса, халыққа қызмет көрсету әлдеқайда арта түсер еді. Бұл игілікті іске көп қаражат та жұмсалған жоқ. Аталмыш жобаға бар болғаны 300 мың теңге ғана бөлінген. Ал оның пайдасы зор болатынына сенімдімін. Қазір өзге облыстардан әлеуметтік сала мамандарын сурдо аудармашылыққа үйретуді сұраған өтініштер түсіп жатыр, — дейді Рауан Қалиев.
Бұдан өзге БҰҰ Даму бағдарламасы қалалық жұмыспен қамту және әлеуметтік бағдарламалар бөлімінің ғимаратында кедергісіз орта қалыптастыру мақсатындағы жобаға қолдау көрсеткен. Жоба аясында бөлінген 1 млн. 800 мың теңге қаражатқа мүгедектерге арнайы ұстап жүру тұтқалары, шақыру батырмасы, жол көрсет-кіштер мен арнайы тазалық орны жарақталыпты. Сондай-ақ ғимараттағы сүйеніштер мен бөлмелерге брайль жазуымен жазылған арнайы жол көрсеткіштер орнатылған. Бұл нашар көретіндерге қандай қабатта жүргендері мен қажетті қызмет көрсететін бөлмелердің нөмірін жылдам табуға мүмкіндік бермек. БҰҰ Даму бағдарламасы өкілдерінің айтуынша, аталған мекеме енді шаһардағы барлық нысандарға үлгі болуы керек. Жоба бастамашылары Семейдегі өзге де әлеуметтік мекемелер өздерінен үлгі алатынына сенімді.
А. САМАТҰЛЫ,
«Семей таңы»
