Семей қаласы әкімінің орынбасары Надежда Шарованың төрағалығымен қала әкімдігі жанындағы жастар істері жөніндегі кеңестің кезекті отырысы өтті. Онда өңірдегі мемлекеттік жастар саясатының жүзеге асырылу мәселелері жан-жақты талқыланды.
СММУ –де өткен басқосуға кеңес мүшелері, мемлекеттік органдардың, жастар ұйымдарының өкілдері қатысты. Кеңес отырысын алғы сөзбен аш-қан Надежда Шарова Елбасының жыл сайынғы Жолдауларында жастардың қоғамдағы орнын ескере отырып, олардың алаңсыз білім алуына мемлекет тарапынан барынша жағдай жасау керектігін және жастар да өз кезегінде еліміздегі игі істерге үлес қосуы қажеттігін әрқашан атап көрсететінін жеткізді. Сондай-ақ Мемлекет басшысының тапсырмасымен Үкімет, жергілікті атқарушы органдар өкілдері жас буынға барынша қолдау көрсетіп келе жатқанын атап өтті.
Күн тәртібіндегі алғашқы мәселе бойынша баяндама жасаған қалалық жұмыспен қамту және әлеуметтік бағдарламалар бөлімі басшысының міндетін атқарушы Азамат Құрманғалиев қаладағы жастар тәжірибесінің және бос орындар жәрмеңкесінің ұтымды ұйымдастырылуы бойынша қолданылып жатқан шаралар барысына тоқталды. Оның айтуынша, бүгінде «Өңірлерді дамыту», «Бизнестің жол картасы – 2020» мемлекеттік бағдарламалары бойынша жастарға тәжірибеден өтіп, жұмысқа орналасуларына барынша жағдай жасалып отыр.
— Ағымдағы жылы «Жастар тәжірибесі» бағдарламасы бойынша 406 жас маман алты айға дейінгі мерзімге жұмысқа орналасты. Бүгінгі күні олардың 132-сі тәжірибеден өткен жерлерінде тұрақты жұмысқа алынды. Бұдан өзге қала жастары кәсіби маман даярлау бойынша да білім алуда. Жыл басынан бері 172 жас арнайы кәсіптік білім алып шығыпты. Білім алу барысында оларға тамақтануға, медициналық тексерістен өтуге, ауылды жерлерден келетіндерге жол ақысы төленеді. Бүгінгі күні жастардың 81-і тұрақты жұмыс орындарына орналасты, — дейді Азамат Құрманғалиев.
Жұмыспен қамту және әлеуметтік бағдарламалар бөлімінің мәліметінше, ауылды жерлердегі жұмыссыз жастарды қолдау мақсатында да біраз істер атқарылған. Айталық, «Жұмыспен қамтудың жол картасы — 2020» бағдарламасы бойынша өңіріміздің жеті жас азаматы 11 млн. теңге көлеміндегі шағын несиеге ие болыпты. Бүгінгі күні олар өз кәсіптерін дөңгелетіп, қосымша он адамға жұмыс берген.
Жастарды қолдау бағытында қолға алынған тағы бір игілікті іс ретінде облысымыздағы «Өрлеу» пилоттық жобасын айтуға болады. Бүгінге дейін әлеуметтік көмек себебінен қарекетсіздікке көше бастаған тұрғындар белсенділігін арттырып, жұмыспен қамтуға бағытталған жоба биыл алғаш рет қолға алынған. Бұған дейін елімізде жан басына шаққанда орташа табысы ең төменгі күнкөріс деңгейінен төмен отбасыларға атаулы әлеуметтік көмек төленіп келді. Енді «Өрлеу» жобасы аясында осы көмекке қосымша ай сайын қаржы бөлінуде. Бұл тұрмысы төмен отбасылардың өз кәсібін ашуға септігін тигізеді.
Бұдан әрі Семей қаласының экономика және бюджеттік жоспарлау бөлімінің басшысы Гүлжан Алтынбекова қаламыз бойынша «Дипломмен- ауылға» бағдарламасының жүзеге асырылу барысы туралы сөз қозғады. Ол аталмыш бағдарламаның тиімділігі мен негізгі шарттарын түсіндіріп өтті.
— Бүгінгі күні Үкімет тарапынан жастарға барлық жағдай жасалып отыр. Сондықтан да жастарымыз ауылды жерлерге барып жұмыс жасаулары керек. Әрбір жас ауылда жүріп тәжірибеден өтетін болса, келешекте жұмыс істеулеріне әлдеқайда жеңіл болады. Сондықтан жастарды аталмыш бағдарламаға белсенді түрде қатысуға шақырамын, — деді бөлім басшысы Гүлжан Алтынбекова.
Кеңес отырысында сондай-ақ Семей қаласындағы жастар кәсіпкерлігінің дамуы және осы салаға қатысты мемлекеттік бағдарламалардың игілігі және «Нұрлы жол» мемлекеттік бағдарламасын жүзеге асыру шеңберінде жас отбасылар және жастарды баспанамен қамтамасыз ету бойынша қабылданған шаралар жөнінде ақпарат тыңдалды.
— Бүгінгі жиында келелі мәселелер талқыға салынып отыр. Оның барлығы Тәуелсіз Қазақстанның келешегі үшін қозғалуда. Елбасы халыққа арнаған Жолдауында кәсіптік білімге ерекше назар аударды. Оның себебі де түсінікті. Бүгінгі күні еліміздегі кейбір салаларда мамандар тым көп болып отыр. Сондықтан мамандық таңдауда оқушылармен жұмыла жұмыс жасауымыз керек. Қазір елімізге құрылысшылар, ауыл шаруашылығы мамандары және техникалық мамандықтар қажет, — деді кеңес отырысында сөз алған Семей қаласы кәсіпкерлік бөлімінің басшысы Марат Нүгеров.
Кеңес отырысын қорытындылаған қатысушылар басқосуда өзекті мәселелер талқыланғанын, алдағы уақытта жұмыла жұмыс жасау керектігін баса айтты. Жиын соңында кеңес мүшелері ұсыныс-пікірлерін ортаға салып, қалада мемлекеттік жастар саясатын жүзеге асыру аясында атқарылған істерге оң бағаларын берді.
Асан МЫРЗАХАН,
«Семей таңы»
