Семей қаласындағы облыстық Абай атындағы кітапханада ҚР Президенті Жолдауын насихаттауға арналған басқосу болып өтті. Бұл ретте қаламыздағы «Жас Отан» жастар қанаты «Елбасы Жолдауы — басты бағдар» атты тақырыпта кең ауқымдағы дөңгелек үстел ұйымдастырды.
Аталмыш шараға қаламыздағы жоғары және арнаулы білім беретін оқу орындарындағы студент жастар ұйымдарының жетекшілері, белсенді жастар жиналды.
— Дөңгелек үстелді өткізудегі басты мақсат — жастар арасындағы қазақстандық патриотизмді дамыту, отаншылдық сезім қалыптастыра отырып, Елбасының жаңа Жолдауын насихаттау. Ұлт Көшбасшысы өзі атап өткендей, бүгінгі жаһандану дәуірінде ел жастарының отаншыл болып өсулері — алдыңғы кезекте тұрған жайт. Сонымен қатар алдағы уақыттарда Президент Жолдауын насихаттауға арналған осындай шараларды қаламыздағы жоғары оқу орындары арасында да ұйымдастыратын боламыз, — дейді Семей қалалық «Жас Отан» жастар қанаты қоғамдық бірлестігінің төрағасы Айдос Төлеуханов.
Дөңгелек үстел басына жиналған жастар алдында ішкі саясат бөлімінің басшысы Айдар Садырбаев кіріспе сөз алды.
– Елбасының Жолдауына семейлік жастардың нақты іспен жауап беретін кезеңі басталды. Бұл ретте әрқайсыңыздан үлкен белсенділік күтеміз, — деп атап өткен Айдар Серікқазыұлы 30 қараша күнгі Елбасы Жолдауының мәні мен маңыздылығына, Жолдау басымдықтарына тоқталып өтті.
Аталмыш жиын барысында жастар Елбасы Нұрсұлтан Әбішұлы Назар-баевтың «Қазақстан жаңа жаһандық нақты ахуалда: өсу, реформалар, даму» атты Қазақстан халқына Жолдауын әр қырынан талқылап, өз пікірлерін білдіріп өтті.
«СТ — ақпарат»
