Қадірлі ағайын!
Мемлекет басшысы Нұрсұлтан Әбішұлы Назарбаевтың басшылығымен қолымызға тиген Тәуелсіздік мерекесі құтты болсын!
Бұл күн – біздің Отанымыздың әрбір азаматы үшін қастерлі мереке. Көпұлтты халқымыздың бірлігі мен өзара түсіністігінің арқасында еліміз Тәуелсіздігінің 24 жылдығын атап өтуде. Тарих тұрғысынан аз уақыт ішінде халқымыз Елбасымен бірге мемлекеттілігімізді қалыптастырып, әлеуметтік-экономикалық даму жолына түсті. Қазақстан Республикасы өзін бейбітшілікті сүйетін ел ретінде танытты.
Біздің Семей елі әрқашан Елбасының саясатын қолдап, алдымызға қойған барлық міндеттерді нақты істермен орындау жолында еңбек етіп келеді.
«Қазақстан жаңа жаһандық нақты ахуалда: өсім, реформалар, даму» атты Жолдауында Президент дамудың негізгі басымдықтарын айта келе, елдігімізді, Тәуелсіздігімізді баянды ету жолында береке-бірлігімізді нығайтып, ішкі татулығымызды сақтауға үндеді.
Тәуелсіздігімізді одан әрі нығайтып, Отанымыздың озық елдер қатарынан көрінуі үшін атқаратын игі істеріміз сәттілікке ұлассын!
Бостандық пен еркіндіктің бастауы болған мемлекеттік мереке – Тәуелсіздік күні қарсаңында баршаларыңызға амандық, бақ-дәулет, береке-бірлік тілейміз!
Егемен еліміздің еңсесі биік, тұғыры берік, ғұмыры Мәңгілік болсын!
Құрметпен, Қала әкімі Е. СӘЛІМОВ, Қалалық мәслихат хатшысы Б. АҚЖАЛОВ.
