22 маусым күні Семейдің Абай атындағы театрында ШҚО әкімінің жүлдесіне арналған V Республикалық «Жайдарман» ойындары өтті. Көңілді тапқырлар сайысын өткізудегі негізгі мақ-сат жастар арасында мәдени құндылықтарды насихаттау әрі олардың шығармашылық қабі-леттерін дамыту болып табылды.
Облыс әкімінің кубогы сарапқа салын-ған «Жайдарман» аламанына Алматы, Атырау, Орал, Павлодар, Семей және Өскемен қалалары мен Жамбыл облысынан бірнеше командалар қатысуға ниет білдіріпті. Олардың дені Көңілді тапқырлар клубының республикалық жоғарғы лигада өнер көрсететін құрамалары. Сайысты ұйымдастыруға ШҚО ішкі саясат басқармасына қарасты Жастар орталығы ұйытқы болған. Бесінші мәрте өткізіліп отырған Семейдегі республикалық жарысты көруге келген әзіл сүйер қауымның қарасы бұл жолы да көп болды. Ал әзіл кешін «Қазақстан КВН одағы» РЖҚБ президенті Есен Елеукен жүргізді. Айта кеткен жөн, аймақ басшысының жүлдесіне арналған алғашқы «Жайдарман» ойындары 2010 жылы Зайсан ауданында бастау алған еді. Содан бері сайыс дәстүрге айналып, әр жылдары Өскемен қаласы, Абай, Үржар және Аягөз аудандарында өткен болатын. Биылғы жылы бұл мәртебе Семей қаласына бұйырыпты. Ойын барысында жас әзілкештер көрермендер назарына түрлі тақырыптағы әзілдерін ұсынды. Қуантарлығы — командалар қоғамдық-әлеуметтік тақырыптарды да қозғап, жиналған қауымға ой сала білді. Жайдарманшылардың көшбасшысы Есен Елеукен атап өткендей, ел жастары арасында бұл ойынға деген қызығушылық күннен-күнге артып, бүгінде көңілді тапқырлардың қатары еселеніп келеді екен. Сондай-ақ іс-шара кезінде қатысушылар асық ату сынды қазақ халқының ұлттық ойындарынан өзара сынға түсіп, күйшілер «домбыра думанын» ұйымдастырды. Ал жарыс қорытындысына келер болсақ, әділ қазылардың ұйғарымымен, бас жүлде Атырау қаласының «Сағыз» құрамасына табысталды. Екінші орынға Жамбыл облысынан келген «Шу-Чу» командасы лайық деп танылса, үздік үштікті Өскемен қаласының құрамасы түйіндеді. Осылайша, ШҚО әкімінің кубогы мұнайлы өлкенің өрендеріне бұйырды. Кубоктан бөлек, І орын алған жеңімпаздарға ұйымдастыру комитеті арнайы 150 мың теңге көлемінде сыйақы әзірлеген екен. Сонымен қатар ІІ және ІІІ орыннан көрінген командаларға да қаржылай сыйлықтар табысталды. Ал «Үздік ойыншы» атағына Батыс Қазақстанның ҚазИТУ құрамасының мүшесі Қабдол Тілеков қол жеткізді. Бұған қоса ШҚО-ның облыстық мәслихат депутаты Айдос Серікқалиұлы «Көрермен көзайымы» аталымы бойынша өзінің арнайы дайындаған жүлделерін бірнеше ойыншыға табыс етті.
Шара соңында қалалық ішкі саясат бөлімінің басшысы Айдар Садырбаев сөз алып, сайыстың жоғары деңгейде өткендігін тілге тиек етіп, елімізде жастар саясаты бойынша ауқымды істер атқарылып жатқанын атап өтті.
Жақсылық МҰРАТҚАЛИҰЛЫ, «Семей таңы»
