23 маусым – Мемлекеттік қызметшілер күніне орай ұйымдастырылған басқосу Семей қаласының әкімдігінде жас мамандардың салтанатты түрде ант қабылдауымен басталды. Еңбек жолдарын мемлекеттік қызметтен бастаған 9 жас маманға осы саланың алдыңғы буын өкілдері сәт сапар тіледі.
Жас мамандарға Семей қаласы әкімі аппаратының басшысы Зәуреш Исабаева, қалалық мәслихат хатшысы Бейсенбек Ақжалов және қалалық ардагерлер кеңесінің төрағасы Амантай Доғалақов өздерінің ізгі тілектері мен құттықтауларын жолдады. Шара барысында алғаш сөз алған Семей қаласы әкімі аппаратының басшысы Зәуреш Исабаева жиналғандарды Мемлекеттік қызметшілер күнімен құттықтап, жұмыстарына жеміс тіледі. Бұдан кейін мінберге барлық ант қабылдаушылар кезекпен шақырылып, салтанатты жағдайда ант қабылдады. Қазақ елінің өсіп-өркендеуіне үлес қосуға серт бергендер ҚР-ның Ата Заңында көрсетілген қағидаттарды, азаматтық және халықаралық келісімді қатаң сақтауға, Қазақстан Республикасына адал қызмет етуге уәде етті. Ал қалалық ардагерлер кеңесінің төрағасы Амантай Доғалақов Мемлекеттік қызметшілер күні еліміз үшін айтулы мереке екенін атап өтті.
— Құрметті жас мамандар! Мемлекеттік қызмет — өте жауапты іс. Әр мемлекеттік қызметкер өз жұмысына асқан жауапкершілікпен қарауға тиіс. Өйткені мемлекеттік қызметшінің беделінің жоғары болуы — мемлекеттің абыройы. Қызметтеріңде табанды, білімді болсаңдар, әрқашан жолдарың ашық. Халыққа адал қызмет етіңдер,- деген Амантай Айтмұрзаұлы қазіргі күні елімізде көптеген мемлекеттік бағдарламалардың жүзеге асырылып жатқанын, оның мемлекеттік қызметкерлердің қызмет көкжиегін кеңейтуге молынан мүмкіндік беретінін атап өтті. Сөз соңында жаңадан қабылданған мемлекеттік қызметшілердің жұмыстарына сәттілік тіледі.
Өз кезегінде сөз алған қалалық мәслихат хатшысы Бейсенбек Ақжалов барша мемлекеттік қызметшілерді төл мерекелерімен құттықтап өтіп, жас мамандарға қиындығы мен қызығы қатар жүретін салада табандылық танытуға кеңес берді.
— Баршаларыңызды бүгінгі Мемлекеттік қызметшілер күні-мен құттықтаймын. Бүгін бір топ жас маман ант беріп, үлкен жолға шығып отыр. Алдағы уақытта жұмыстарыңызды беделді атқаруға тілектеспін. Еңбектеріңіз жанып, сіздерге қарап қуана берейік, — деді мәслихат хатшысы.
Жиын соңында аппарат басшысы Зәуреш Рамазанқызы қызметімен ерекшеленген әкімдік қызметкерлеріне абыройлы еңбектері үшін Семей қаласы әкімінің грамоталары мен алғыс хаттарын табыс етті.
Асан МЫРЗАХАН, «Семей таңы»
