26 маусым – Нашақорлық пен есірткінің заңсыз айналымына қарсы халықаралық күрес күні. Бұл туралы шешім 1987 жылдың 7 желтоқсанында БҰҰ-ның Бас Ассамблеясында қабылданған болатын. Ғасыр індеті саналатын ахуал әлемнің көптеген елдерін ерекше алаңдатып отыр. Статистика деректеріне сүйенсек, әлем бойынша екі жүз миллионнан астам нашақор бар, ал біздің еліміздегі есірткі тұтынатындар саны 55 мыңнан асып жығылады екен.
Өкінішке орай, бұл қауіпті дерттен Семей өңірі де шет қалып отырған жоқ. Күні бүгін қалалық наркологиялық диспансер есебінде 500-ге жуық есірткіге тәуелділер тіркелген. Дегенмен сала мамандары бұл көрсеткіштің нақты еместігін алға тартуда. Өткен аптада Семей қалалық наркологиялық диспансерде аталмыш дерттің алдын алу, одан бас тарту жолдары сөз болған баспасөз жиыны өткізілді. Іс-шараға наркологиялық диспансер, салауатты өмір салтын қалыптастыру орталығының мамандары, қалалық ІІБ және бірқатар мемлекеттік емес ұйымдарының өкілдері қатысты. Басқосуда сөз алған наркологиялық диспансер директоры Павел Брыжахин есірткінің қай қоғамда болмасын өзекті екендігін, оның адам денсаулығына, қала берді ұлт тағдырына балта шабатындығын айтып өтті.
— Бүгінде нашақорлықпен күрес мәселесі әлі де болса өзекті болып қалып отыр. Қазіргі күні емдеу мекемесіне есірткі затын пайдаланатын 500-ге жуық адам тіркелген. Алайда бұл көрсеткішті нақты деп айтуға болмайды. Өйткені арнайы емдеу мекемелерінде есепке тұрмағандары қаншама. Қазақстанға зерттеу жұмыстарын жүргізген халықаралық статистердің ұсынысы бойынша бұл көрсеткішті кем дегенде 4-5 есеге көбейту керек. Демек, Семейдің бес мыңға жуық азаматы есірткіден зардап шегіп отыр деген сөз. Есірткі пайдаланатын адам тек өзіне ғана емес, қоршаған ортасына да, отбасы мен туған-туыстарына да зиянын тигізеді. Бұл да үлкен әлеуметтік мәселе болып отыр,- дейді Павел Григорьевич.
Айта кетуіміз керек, теріс жолға түскендердің арасында әсіресе жастар көптеп саналады екен. Өйткені есепте тұрғандардың дені 30 жасқа дейінгі азаматтар көрінеді. Дегенмен, дәрігерлердің айтуынша, соңғы бес жылмен салыстырғанда шаһарымызда бұл дертке шалдыққандар екі есеге дейін кеміген. Бір қуантарлығы, қаламызда есепте тұрған жасөспірімдер ішінде нашақор балалар жоқ.
— Жастар көбіне бос жүргеннен немесе тікелей қоршаған ортасына байланысты осындай жолға түседі. Кейбіреулер тіпті жұмыссыздықты да сылтау етеді. Ойланбай бір рет пайдаланған есірткі кейін бүкіл өміріне балта шабады. Бұл жерде жалғыз медицина қызметкерлерінің күші жетіспейді. Қоғамдық дертпен баршамыз бірлесе күресуіміз керек. Бұл тұрғыда бұқаралық ақпарат құралдарының алатын орны ерекше. Құқық қорғау органдарының да атқарып жатқан жұмысы ауқымды. Сондай-ақ жастар ұйымдары, үкімет-тік емес ұйымдар да өз үлестерін қосуда. Міне, сонда барып бұл індетті жеңуге болады,- дейді қаламыздың бас наркологі.
Басқосуда сөз алған өзге де сала мамандары жасөспірімдер мен жастар арасындағы нашақорлықтың алдын алу бағытында атқарылып жатқан жұмыстарды сөз етіп, ең бастысы, отбасы тәрбиесіне баса назар аудару керектігін сөз етті. Жиын соңында баспасөз мәслихатын өткізушілер журналистер тарапынан қойылған сауалдарға жауап берді.
Асан МЫРЗАХАН, «Семей таңы»
