Өткен аптаның соңында, Нашақорлыққа қарсы халықаралық күрес күніне байланысты, Семейдің орталық саябағында «Есірткіге жол жоқ!» атты акция ұйымдастырылды. Іс-шара қалалық ІІБ, Семей қаласының әкімдігі мен Салауатты өмір салтын қалыптастыру орталығының қолдауымен өткізілді.
Акцияны өткізудегі негізгі мақсат заңсыз айналымдағы есірткімен күресті күшейту, өскелең ұрпаққа нашақорлықтың зиянын түсіндіру арқылы оларды салауатты өмір салтын ұстануға шақыру болып табылды. Семей қалалық ІІБ-ның есірткіге қарсы күрес бөлімінің қызметкерлері оқушыларға есірткіден келетін зардапты түсіндіріп, оны сатумен айналысатын тұлғалар қылмыстық жауапкершілікке тартылатынын жеткізді. Есірткіге қарсы күрес бөлімінің аға жедел уәкілі, полиция капитаны Гаухар Серікқызы келтірген ресми мәліметке сәйкес, ағымдағы жылдың 6 айында осы фактіге қатысты 51 қылмыстық іс тіркеліпті. Оның екеуі бойынша есірткі заттары аса ірі көлемде сақталғаны анықталды. Жүргізілген шаралардың нәтижесінде заңсыз айналымда болған 56 келіден аса есірткі заттары тәркіленген екен.
— Оның үстіне біздің бөлім алдын алу жұмыстарына да жақсы көңіл бөліп келеді. Мәселен, үстіміздегі жылдың алты айында жалпы орта білім беру мекемелерінің тәрбиеленушілерімен он бестен аса кездесу ұйымдастырылып, дөңгелек үстелдер және пікірсайыстар өткізілді. Бүгінгі қолға алынған акция — сол жоспарлы жұмыстың жалғасы. Оны бірлесіп өткізуге демеу білдірген қалалық әкімдік пен Салауатты өмір салтын қалыптастыру орталығына алғысымызды айтамыз,- дейді полиция капитаны Гаухар Серікқызы.
Сондай-ақ акция кезінде «Көңілді старт» эстафетасы және суреттер байқауы сынды бірқатар ойындар мен конкурстар өтті. Оның қорытындысы бойынша үздік қатысушылар арнайы сыйлықтармен марапатталды. Шара соңы шағын концерттік бағдарламаға ұласты.
Жақсылық МҰРАТҚАЛИҰЛЫ, «Семей таңы»
