Өткен аптаның соңында «Нұр Отан» партиясының Семей қалалық филиалында республикалық «Әділет кеңес береді» акциясы аясында азаматтарды құқықтық сұрақтары бойынша қабылдау өткізілді. Шара аясында қалалық әділет басқармасы қызметкерлері, адвокаттар мен нотариустер тұрғындарға жан-жақты құқықтық көмек көрсетіп, заңнама нормаларына түсініктеме жасап, кеңестер берді.
Қабылдауға алғаш келгендердің бірі Семей қаласының тұрғыны Дария Қабылғазинова мекенжайлық әлеуметтік көмектің тоқтатылып қалғанына шағымданып, оның қаншалықты заңды екенін білгісі келетінін айтты. Осы ретте сөз алған «Нұр Отан» партиясы Семей қалалық филиалы төрағасының бірінші орынбасары Зульфия Жамалтдинова қабылдауға қатысып отырған адвокаттардан осы шағымға қатысты түсінік берулерін өтінді. Сала мамандары шағымданушының барлық құжаттарын қарастыру керектігін, содан кейін барып мәселенің анық-қанығына жетуге болатынын атап өтті. Сонымен қатар заңгерлер қабылдауға келген азаматшаға барлық қызметтердің тегін жүргізілетінін де атап өтті.
Халық партиясынан қаладағы Нұрбаев көшесінде тұратын бір отбасы да көмек сұрай келіпті. Көршісімен неше жылдан бері жер дауын шеше алмай жүрген жанұя заң қос тарапқа теңдей жүзеге асырылса деген шағыммен жүгінді. Айтуларынша, көршісі заңды аттап басып, неше жылдан бері осы отбасыға тиесілі болып келген жер телімін иеленіп алмақ ниетте екен. Сәйкесінше, заңсыздыққа барған көршісін де отбасы сотқа беріпті. Заңгерлер өз кезектерінде әділеттілікті талап етіп келіп отырған отбасының мәселесін тек сот орындары ғана шешетінін, дегенмен де қазақ халқының көршісімен әрқашан тату болғандығын айтып, туындаған мәселені бейбіт жолмен шешуге тырысуға кеңес берді.
Бұл жолғы қоғамдық қабылдауға келген тұрғындарды, негізінен, құқықтық мәселелер толғандырғанымен, әлеуметтік мәселелер де сырт қалған жоқ. «Нұр Отан» партиясының Семей қалалық филиалының хабарлауынша, республикалық «Әділет кеңес береді» акциясы халықтың құқықтық сауаттылығын көтеруге және олардың қызығушылық туғызатын мәселелер бойынша жауап алуларына мүмкіндік береді. Шараның негізгі мақсаты азаматтардың азаматтық санасын және жауапкершілігін көтеру үшін тұрғындар арасында консультативтік жұмыс жүргізу және кең көлемді құқықтық көмек көрсету, сонымен қатар азаматтармен кері байланыс орнату болып табылады.
Асан МЫРЗАХАН, «Семей таңы»
