Жуырда Көкшетау қаласында пауэрлифтинг спортынан мүмкіндігі шектеулі жандар арасында ел біріншілігі өтті. Бұл сайыста семейлік спортшылар да өнер көрсетуге мүмкіндік алып, нәтижесінде екі алтын, бір күміс және бір қола медаль еншіледі. Ал апта басында жарыс жеңімпаздарын туған-туыстары мен жаттықтырушылар темір жол вокзалында арнайы қарсы алды.
Семейдің құрама командасын баптайтын Андрей Алтайбаевтың айтуынша, биылғы Қазақстан чемпионатына 100-ден аса кілең мықтылар жиналыпты. Мәселен, қатысушылардың арасында әлемдік додаларда алдарына жан салмай, топ жарып жүрген бірқатар саңлақ спортшылар да болған. Осындай тегеурінді бәсекелестікте семейліктердің үздіктер қатарынан көріне білгендігін айтады жерлестеріміздің жаттықтырушысы.
— Көкшетау қаласында ұйымдастырылған ел біріншілігі жоғары дәрежеде өтті. Барлық облыстар оған жақсы дайындықпен келді. Шәкірттеріміз зілтемірді жатып көтеруден сынға түсті. Олардың арасында Андрей Москалев пен Ольга Близнец 1-орынды иеленді. Жаттығулардың қорытындысы бойынша, Андрей 85 келіні еңсерсе, Оля 27, 5 келіні оңай бағындыра білді. Оляның осындай жарысқа алғаш рет қатысып отырғанын ескерсек, оның көрсеткен нәтижесін жаман емес деп бағалауға әбден болады. Дегенмен де ол мұнымен тоқтап қалмақ емес. Ал қалған саңлақтарымыздың арасынан Серік Айсаулин күміс, Сергей Струков қола жүлдеге қол жеткізді. Осылайша, шәкірттеріміз екі алтын, бір күміс және бір қола медальді қанжығаларына байлады. Жетістік жаман емес. Алайда алдағы уақытта бұл көрсеткішті еселей түсу үшін бар күш-жігерімізді салатын боламыз. Келер 2017 жылы мүмкіндігі шектеулі жандар арасындағы пауэрлифтингтен Қазақстан чемпионаты Семейде өтуі мүмкін. Бұл — қуантарлық жаңалық. Себебі өз қаламызда өткізілетін аламанда спортшыларымыз мүдіріп қалмайтынына еш шүбә келтірмейміз. Тағы да бір айта кетерлігі, осы жоғарыда есімдері аталған спортшылар, біздің залда тегін дайындалады. Олардың жаттығып жүргендеріне жарты жылдай ғана уақыт болды. Өткен жылы Талдықорған қаласында ұйымдастырылған республикалық жарыста да Андрей Москалев пен Серік Айсаулин тұғырдың биігінен көрінген еді. Саңлақтарымыз өздері қатысқан бірде-бір жарыстан жүлдесіз қайтқан емес. Мүмкіндігі шектеулі жандарға барынша қолдау көрсетіп, олардың спортпен шұғылданып, салауатты өмір салтын ұстануларына мейілінше жағдай жасауымыз қажет. Сонда ғана бұл санаттағы адамдарды қоғамға бейімдей аламыз деп есептеймін. Бұл жайында Елбасы өз Жолдауында баса айтқан болатын,- дейді Андрей Алтайбаев.
Сайыста өзінен әлдеқайда күшті спортшылармен бәсекеге түсіп, қарсыластарын шаң қаптырып, алтыннан алқа таққан жерлесіміздің бірі — Андрей Москалев. Андреймен сайысқа түскен зілтеміршілердің басым бөлігі халықаралық додаларда шыңдалғандар екен. Бірақ намысты жігіт жеңісті жұлып әкетті. Енді Андрейдің бар арманы — байрақты бәсекеде тәуелсіз еліміздің көк Туын көкте желбірету.
Жақсылық МҰРАТҚАЛИҰЛЫ, «Семей таңы»
