Өскемен қаласында Қазақстан Республикасында орта білім мазмұнын жаңарту шеңберінде орыс тілінде оқытатын мектептердегі қазақ тілі пәні бойынша педагог кадрлар жаңартылған білім беру бағдарламасы бойынша 160 академиялық сағат көлеміне курстан өтіп, біліктілігін арттырды.
Жаңартылған білім беру бағдарламасы қазіргі таңдағы білім беру үдерісіндегі мұғалімнің шеберлігін шыңдап, жаңашылдыққа үйренуге және тиімді әдіс-тәсілдерді басшылыққа алып, тұлғалық жетілуіне зор ықпалын тигізді. Жалпы, аталмыш курс бүгінгі қоғамдағы мұғалімнің педагогикалық кәсіби біліктілігін жетілдіріп, оқытудың тиімді әдіс-тәсілдерін меңгеруіне, оны іс жүзінде тәжірибеде қолдануына жағдай туғызды. Курс тыңдаушылары 4 топқа бөлінді. ШҚО бойынша 2 топтың жетекшісі Семей қаласындағы № 6 гимназияның жоғары санатты қазақ тілі мен әдебиет пәні мұғалімі Ерболат Шөкенов болды. Жаңартылған білім беру бағдарламасы курсының құрылымы күрделі теорияларға негізделгендіктен, бастапқыда әр жақтан барған тыңдаушыларға түсініксіздеу тұстары да болғаны жасырын емес. Алайда Ерболат Шөкеновтің мол іс-тәжірибесі мен өз саласын жетік, терең білуінің арқасында аз ғана уақыт ішінде күңгірт тұстарға білімнің шуағы түсіп, біртіндеп мұғалімдерге берілген білім түсінікті бола бастады. Бір жағынан, Ерболат Слямбекұлы бұл мәселені тәжірибе жүзінде көрсету арқылы мұғалімдердің санасына жеткізіп, жүрегіне жол тапты. Мысалы, белсенді оқылымның әдіс-тәсілдері ретінде ТКО, қабырғадағы рөл, эмоция кестесі, ыстық орындық, пікірлер сызығы, қарым-қатынас аймағы сияқты тиімді әрі қызықты тәсілдер, зерттеу дағдыларын дамытуға арналған дара диаграмма, қос диаграмма, уақыт тізбегі, хикая картасы, 9 гауһар, балық қаңқасы тәрізді графикалық органайзерлер және критериалды бағалауды айтуға болады. Күн сайын ықшам сабақтарды жоспарлау барысында мұғалімдердің білім көкжиегі кеңейе түсіп, жаңа қадамдарға қол жеткізді. Жалпы, сабақ кезеңінде ықшам сабақтарды жоспарлау мұғалімді жүйелі жинақылық пен ептілікке үйретіп, уақытты тиімді жоспарлап, педагогикалық тәсілдерді меңгеруге оң ықпал жасады. Осы орайда Ерболат Слямбекұлының теория жүзінде айтылған құндылықтарды, ақпараттарды, қолданылған ресурстарды сабақ кезеңінде мұғалімдерге арнайы тапсырмалар ретінде ұсынып, оларға шынайы сезіндіре білді. Сабақ барысында Ерболат Слямбекұлының кәсіби біліктілігінің нәтижесінде теория мен тәжірибенің тамаша үйлесімі ұдайы көрініс тауып отырды. Осы сипат курстың мазмұнды әрі мағыналы, қызықты өтуіне себеп болды. Сондықтан осындай кәсіби біліктілігімізді жетілдіру бағдарында бізге табандылық пен шыдамдылық танытып, өз идеяларымен бөліскен, әрбір сауалымызға жалықпай жауап беріп, жаңа білім үйреткен Ерболат Слямбекұлына ШҚО бойынша бүкіл курс мұғалімдері үлкен алғыстарын айтып, ризашылықтарын білдірді.
Курс тыңдаушылары жаңартылған білім беру бағдарламасын тамамдағаннан кейін Өскемен қаласындағы Назарбаев Зияткерлік мектебінде онлайн-тест тапсырып, ай көлемінде алған білімдерінің нәтижесін көрсетті.
Жаңа мазмұнда білім беру — XXI ғасырдың басты талабы. «Білімдінің күні жарық, білімсіздің күні ғаріп» деген халық мақалына орай, XXI ғасыр — білім мен оқудың ғасыры, сондықтан мұғалімдерден жаңа педагогикалық әдіс-тәсілдерді қолдану арқылы сапалы білім беріп, мемлекеттік тілдің мәртебесін арттыру талап етіледі. Жалпы, түйіндей айтқанда, жаңартылған білім беру бағдарламасының жаңаша оқыту жүйесі нағыз жаңа ғасырдың шығармашыл ұстазы мен бәсекеге қабілетті, рухани дамыған жеке тұлғасын даярлаудың бірден-бір қайнар көзі деп ойлаймын.
Меруерт МҰХАМАДИЕВА, «№ 2 жалпы орта білім беретін мектеп» КММ, Семей қаласы.
