Шілденің бірінші жұлдызы, өткен жұманың кешінде күллі мұсылман жұртшылығы мың айдан қайырлы болған Қадір түнін қарсы алды. Шапағаты мол осынау Рамазан айындағы қастерлі кеште қаладағы Әнет Баба атындағы Қос мұнаралы орталық мешітінде Семей қаласының әкімі Ермак Сәлімов ораза тұтқан жандарға ауызашар дастарқанын жайды.
Ата дінімізде ізгілікке бастау болар сауапты істер көп. Солардың бірі — ауыз бекітіп, сауаптан үміт еткен жандар үшін дәм татқызып, ақ дастарқан басында ортақ тілек тоғыстырып, ақсақалдардың өнегелі әңгімесін тыңдау, жасы үлкеннің батасын алу.
Дәстүрлі дініміздің діңгегі саналар осынау үрдістің жалғасын табуға Семей қаласының әкімі Ермак Бидахметұлы биыл да ұйытқы болды. Ауызашар дастарқанына шаһарымыздағы ораза тұтқан ардагерлер, зиялы қауым өкілдері, ақ жаулықты әжелер жиналды.
Арнайы жайылған дастарқан басында алғашқы сөз алған ҚМДБ-ның Семей өңірі бойынша өкіл имамы Мақсат қажы Алтыбай жиналған қауымды Рамазан айының соңына жетуімен құттықтап, қасиетті Қадір түнінің маңыздылығына кеңірек тоқталды. Сонымен қатар дәстүрлі дініміздегі ағайынның басын қосып дәм татқызу сынды игілікті үрдістің мәні жайын да айтып өтті.
Жылдағы дәстүрге сай ауызашар дастарқанына қаламыздағы өзге де діни конфессиялардың өкілдері шақырылыпты. Көпшілік алдында сөз алған Воскресенск кафедралды соборының настоятелі Федор Проскурин барша жиналған қауымды құттықтап өтті.
— Бүгін, міне, қаламыздағы мұсылман қауымы Қадір түнін қарсы алып отыр. Осынау сәтте біз де өз тарапымыздан ілтипат білдіріп, ізгі ниетпен құттықтау жолдаймыз. Елімізде қаншама ұлттар мен ұлыстар, тілі мен діни сеніміне қарамастан, тату-тәтті ғұмыр кешіп келеді. Лайым Жаратушымыз осы береке-бірліктен айырмаса екен деп тілейміз. Көп ұлтты мемлекетіміздің шаңырағы берік, іргесі тыныш болсын,- деген лебіз білдірді.
Сондай-ақ мұсылмандар үшін осынау қасиетті түннің басталуымен барша семейліктерді жергілікті католиктер бірлестігінің жетекшісі Йозеф Трела да құттықтады.
Осылайша, ақ дастарқан басында ақ тілектер ағытылды. Сөз алған жандардың барлығы да ортақ үйіміздегі береке-бірлік пен ынтымақтың артуына, еліміздің өсіп-өркендеуіне тілектестік білдіріп жатты. Ауызашар соңында жиналған қауым арнайы жайылған дастарқан үшін қала әкіміне ризашылықтарын жеткізді.
Сөз орайында биылғы Рамазан айы 29 күнге созылып, бүгін, яғни 5-ші шілде күні, аяқталып, дініміздегі айтулы мерекелердің бірі Ораза айт мейрамы басталғанын айта кеткен ләзім.
Жақсылық СҮЛЕЙМЕН, «Семей таңы»
