Биыл Бразилияның астанасы Рио-де-Жанейро қаласында өтетін Олимпиада ойындарына да аз уақыт қалды. XXXI мәрте алауы тұтанатын төрт жылдықтың басты бәсекесіне Қазақстанның атынан 100-ден аса спортшы қатысады деп күтілуде. Атап айтқанда, ел саңлақтары спорттың 27 түрінен бақтарын сынайды. Осыған байланысты Қазақстан байкерлер қауымдастығы отандық спортшыларды қолдау мақсатында мотокросс-эстафетасын қолға алып, ел аймақтарын аралауға жолға шығыпты. Ал аптаның екінші күні, яғни 12 шілдеде, эстафета қатысушылары Семей қаласына да келіп жетті.
Белгілі болғандай, байкерлер тобын Қазақстан байкерлер қауымдастығының президенті, әйгілі жиһанкез Дмитрий Петрухин бастап келіпті. Шара ел Тәуелсіздігінің 25 жылдығы мен Алматы қаласының 1000 жылдық мерейтойына арнайы орайластырылған екен. Сонымен қатар саяхатшылар осы эстафета арқылы еліміздің допинг дауына іліккен ауыр атлеттеріне де қолдау білдіруді көздеп отыр.
— Біздің спортшыларды халықаралық деңгейдегі жарыстардан шеттетіп тастағаны көңілге кірбің түсіреді, әрине. Алайда бұл күрмеулі сұрақ та жуық арада оң шешімін табады деген үмітіміз жоқ емес. Дей тұрғанмен де осындай сәттерде барлығымыз жұмылып өз отандастарымызды мейлінше қолдауымыз қажет деп есептеймін. Алматы қаласынан 6 шілде күні сапарға шыққан едік. Семей — біз аялдаған үшінші қала. Осының алдында Өскемен қаласында болдық. Онда Олимпиада чемпионы, жеңіл атлет Ольга Рыпакованың атындағы спорт кешенін аралап көрдік. Облыс орталығының тұрғындары бізді жылы қабылдады. Биыл елімізде бірнеше мерейлі даталар аталып өтілуде. Осы эстафетаны да сол мерекелі шараларға арнауды жөн санадық. Өткен жылы мотошеруді Қазақ хандығының 550 жылдығына орай ұйымдастырған болатынбыз. Ол кезде де мемлекетіміздің түкпір-түкпірдегі аймақтарын аралап шықтық. Саяхат барысында әр өңірдің спортшыларымен кездесу жоспарымызда бар. Олар мотокростың арнайы туына өз қолтаңбаларын қалдыратын болады. Қазірдің өзінде ол байрақта кәсіпқой бокстан Әлем чемпионы, отандасымыз Геннадий Головкин, Олимпиада чемпиондары Александр Винокуров және Илья Ильин сынды бірқатар майталман спортшылардың қолтаңбалары бар. Бұл мотошеруді 5-ші тамызда тамамдайтын боламыз. Дәл сол мерзімде Риодағы жазғы Олимпиада ойындары басталады. Туды ҚР Тұңғыш Президенті мұражайына табыстауды ойластырып отырмыз. Семей еліміздің қасиетті рухани ордасы болып саналатынын жақсы білеміз. Бұл шаһардан қаншама ұлы тұлғалар шықты. Семейліктерге ризашылығымызды білдіреміз. Өте қонақжай. Осы сәтті пайдалана отырып, барша қала тұрғындарын ел Тәуелсіздігінің 25 жылдық мерейтойымен шын жүректен құттықтаймын. Еліміздің береке — бірлігі нығая берсін. Семейліктерді Олимпиада ойындары кезінде біздің спортшыларға жанкүйер болуға шақырамын,- деп түйіндеді өз сөзін Дмитрий Петрухин.
Семейдегі сапарлары барысында Қазақстан байкерлері қаладағы бірнеше спорттық нысандарды аралап, өңір саңлақтарының жетістіктерімен жіті танысып, спортшылармен тікелей тілдесуге мүмкіндік алды. Осыдан кейін мотокросс-эстафетаға қатысушылар көрші Павлодар облысын бетке алды.
Жақсылық МҰРАТҚАЛИҰЛЫ, «Семей таңы»
