«Нұр Отан» партиясы Шығыс Қазақстан облыстық филиалының кезекті қоғамдық қабылдауында азаматтарды жеке мәселелері бойынша ШҚО құрылыс, сәулет және қала құрылысы басқармасы басшысының орынбасары Қанат Дырынбаев қабылдады.
Өскемен қаласының тұрғыны, екі баланың анасы 29 жасар Аида Маратқызы жас отбасы ретінде мемлекеттік бағдарлама бойынша баспана алудың жолдарын сұрастыра келді. Қ.Дырынбаев «Өңірлерді дамыту», «Нұрлы жол» және «Жұмыспен қамтудың жол картасы — 2020» сынды мемлекеттік бағдарламалар бойынша жастарды баспанамен қамту тетіктері бар екенін айтып, нақты мысалдар келтірді. Бүгінде бір ғана «Өңірлерді дамыту» бағдарламасы аясында алты бағытта тұрғын үй құрылысы қолға алынған. Соның бір бағыты бойынша «Тұрғын үй құрылыс жинақ банкі» АҚ арқылы 29 жасқа толмаған жас отбасылардың баспаналы болуға мүмкіндігі бар. Баспананы бағдарламаға қатысушы алғашқы сегіз жылда жалға пайдаланып, кейін өз меншігіне сатып алуына болады. Маманның жауабына көңілі толған Аида Маратқызы берілген кеңес бойынша құжаттар жинауға кірісетінін айтты.
Ал «Элхон» ЖШС директоры, кәсіпкер Ұлықбек Тумашинов көтерген мәселе 200 орындық қалалық балалар ауруханасының құрылысына қатысты болды. Мердігер мекеменің иесі тиісті қаражаттың түспеуіне байланысты аталған құрылыс әзірге кестеден кешігіп жатқанын айтып, партиядан кеңес сұрай келіпті. Қанат Дырынбаев бұл мәселе басқарманың тікелей бақылауында екенін жеткізіп, жоба республикалық бюджеттен қаржыландырылатындықтан, ҚР Денсаулық сақтау және әлеуметтік даму министрлігіне қатынас хат жолданғанын мәлімдеді.
Қоғамдық қабылдауда облыс орталығындағы халыққа қызмет көрсету орталықтарының санын арттыру мәселесі де көтерілді. Бүгінде Өскемен қаласы аумағында төрт бірдей орталық тұрғындарға қызмет етуде. Қала тұрғыны Айдын Кенжиханов халықтың қарасын азайту үшін осы ретте өз ұсынысын жеткізді. Басқарма өкілі жаңадан орталық салу бағытында 2014 жылы жобалық — сметалық құжаттар жасалғанын, бұл жоба 2014 – 2017 жылдар аралығында аяқталуы керектігін жеткізді. Ал осы құрылысқа жауапты мердігер компания өкілдері нысанды кестеден кешіктірмей тапсыратындарына сенімді. Тек ҚР Ақпарат және коммуникация министрлігінен бөлінуге тиіс қаржы әлі түспеген. Министрлік қаржы тапшылығына байланысты бұл жобаны мемлекеттік-жекеменшік әріптестік бағдарламасы арқылы жүзеге асыру жолдарын қарастыруда.
Қабылдау барысында ұсынылған барлық мәселелер бойынша толыққанды жауаптар беріліп, филиал мамандарының назарына алынды.
«Нұр Отан» партиясының Шығыс Қазақстан облысы филиалының баспасөз қызметі.
