Биылғы жылға дейін мүмкіндігі шектеулі жандарды жұмысқа орналастыру деңгейі жұмыс берушілердің азаматтық көқарасымен өлшенген. Енді жағдай өзгеше болмақ. «Халықты жұмыспен қамту» туралы жаңа Заң талаптарына сай жұмыс берушілер бұдан былай жалпы қызметкерлер құрамында 3 пайыз мүмкіндігі шектеулі жандарды еңбекпен қамтуға міндеттеледі. Бұл жайында сәрсенбі күні Семей қаласының ақпараттық орталығында Семей қаласы әкімінің орынбасары Надежда Шарова, жұмыспен қамту және әлеуметтік бағдарламалар бөлімі басшысының орынбасары Болат Мусиннің қатысуымен өткен баспасөз мәслихатында айтылды.
Семей қаласы әкімінің орынбасары Надежда Шарова шаһардың жұмыс берушілерімен халықтың жекелеген санатын жұмысқа орналастыру үшін жұмыс орындарының квотасын белгілеу мәселесіне тоқталып өтті.
— Мемлекетіміздегі әлеуметтік саясаттың бір бағыты – мүмкіндігі шектеулі жандарға барынша қолдау көрсетіп, жағдай жасау. Осы мақсатта 2016 жылдың 6 сәуірінде «Халықты жұмыспен қамту» Заңы қабылданып, онда халықтың жекелеген санатына жататын тұлғаларды жұмысқа орналастыруға квота белгіленген және жұмыс берушілерді квотаға ие тұлғаларды жұмыспен қамтуға міндеттейді. Оның ішінде, мүмкіндігі шектеулі жандарға ерекше көңіл бөлініп отыр,- деді өз сөзінде Надежда Шарова.
Аталмыш Заңның 27 бабына сәйкес, халықтың жекелеген санатына мүмкіндігі шектеулі жандар, пробация қызметінің есебінде тұрған адамдар, бас бостандығынан айыру орындарынан босатылған адамдар, кәмелеттік жасқа толғанға дейін ата-анасынан айырылған немесе ата-аналарының қамқорлығынсыз қалған жастар қатарындағы білім беру ұйымдарының түлектері жатады. Оларға жергілікті атқарушы органдар жұмысқа орналастыруға квота белгілейтіндігі де Заңда көрсетілген. Бұл ретте Семей қаласы әкімдігімен 2016 жылдың 6 мамырында «Мүгедектер үшін жұмыс орындарының квотасын белгілеу туралы» қаулысы қабылданған. Қаулыға сәйкес жұмыс орындарында 3 пайыз мөлшерінде мүмкіндігі шектеулі жандар жұмыспен қамтылмақ. Сонымен бірге халықтың жекелеген санатына жататын өзге тұлғаларға жұмыс орындарында 1 квота қарастырылған. Осындай маңызды міндеттерге мән берген қалалық жұмыспен қамту және әлеуметтік бағдарламалар бөлімі басшысының орынбасары Болат Мусин ағымдағы жылдың 7 айлығы бойынша еңбекпен қамту мәселесіне тоқталды.
-Үстіміздегі жылдың қаңтар айынан бастап Жұмыспен қамту орталығына жұмысқа орналасу мәселесімен 107 мүмкіндігі шектеулі азамат өтініш жасады. Соның ішінде 39 адам жұмысқа орналасты. Сонымен бірге 32 мүмкіндігі шектеулі жан қоғамдық жұмысқа қабылданып, оларға 22 859 теңге көлміндегі ең төменгі жалақы тағайындалды. Жастар тәжірибесі бағдарламасына 10 тұрғын, мүгедектікті оңалтудың жеке бағдарламасына сәйкес кәсіптік даярлау, қайта даярлау және біліктілікті арттыру курстарына 16 адам жолданды,- деді Болат Мусин.
Брифинг барысында қаламызда мүмкіндігі шектеулі жандарға барынша жағдай жасалып жатқандығы, ауруханалар мен әлеуметтік мекемелерге, дүкендер пен дәріханаларға пандустар орнатылғаны жайлы ой қозғалып, жұмыс жүйелі түрде жалғасатындығы айтылды. Сонымен қатар Заң талаптарына сәйкес жаңа жұмыс орынын ашу үшін жұмыс беруші кәсіпорындарға мемлекет тарапынан субсидия берілетіні де айтылды.
Әйгерім ЖАҚЫП, «Семей таңы»
