Сәрсенбі, 10 тамыз күні Францияның Қазақстандағы төтенше және өкілетті елшісі Франсис Этьен Семей қаласына жұмыс сапарымен келді. Француз елшісі бастап келген топ Семей қаласының әкімі Ермак Сәлімовпен кездесті. Елші алдымен Абай ескерткішінің басына гүл шоғын қойып, тағзым етті.
Мәртебелі меймандар сапарының негізгі мақсаты қос мемлекет арасындағы достық қарым-қатынасты одан әрі дамыту және нығайту, сонымен қатар экономикалық салаларда тығыз байланыс орнату. Өңірімізге Фрунцуз елінен келген бір топ делегация алдымен қазақтың ұлы ақыны Абайдың ескерткішіне гүл шоқтарын қойды. Кейін меймандар қалалық әкімдікте шаһар басшысы Ермак Сәлімовпен кездесіп, тараптар өңірдің экономикалық дамуы және екіжақты ынтымақтастықты одан әрі жетілдіру бағыттары жайында әңгімелесті. Семей еліміздің мәдени орталығы, бизнесті жүргізудің барлық жағдайы қарастырылған ірі аймақ. Сондықтан қала басшысы шаһарға инвестициялық қызығушылық танытып отырған қонақтарды Абай, Шәкәрім, Мұхтар туған қасиетті жерде көргеніне қуанышты екенін жеткізді. Сондай-ақ Ермак Бидахметұлы жұмыс тобына Елбасы Н.Назарбаевтың сарабдал саясатының нәтижесінде екі ел арасында экономикалық байланыс орнатуына жол ашылып отырғанын, алдағы уақытта әріптестікті нығайта түсу керектігін атап өтті.
— Бүгінгі кездесуіміз Семей ядролық сынақ полигонының жабылғанына 25 жыл толу қарсаңында өтіп отыр. Бұл атаулы күн қос мемлекетті байланыстыра алады деп ойлаймын. Өйткені сіздердің елдеріңізде де аталған сынақтың жасалғанын білеміз. Осы атаулы күн Семейде дәстүр бойынша шетелдік мәртебелі меймандардың қатысуымен аталып өтіледі. Биыл да 29 тамыз – Дүниежүзілік ядролық қарудан бас тарту күні қарсаңында үлкен жиын өткізуді жоспарлап отырмыз және осы шараға өзіңізді құрметті қонақ ретінде қатысуға шақырамыз, — деген қала әкімі Ермак Сәлімов алдағы уақыттары өзара байланысты нығайтып, әр салада әріптестік орнатуға ниетті екенін жеткізді. Шаһар басшысы кездесуде Семей қаласының әлеуметтік-экономикалық дамуын, бүгінгі күнгі жеткен жетістіктері жөнінде қысқаша ақпарат берді.
Кездесуде тараптар француздық және семейлік кәсіпкерлер арасындағы өзара тиімді әріптестікті дамыту болашағын талқылады. Осы бағытта Францияның Қазақстандағы төтенше және өкілетті елшісі Франсис Этьен тараптарға тиімді ұсыныстарды бірлесе талқылауға шақырды. Франция елшісі сондай-ақ делегацияның жұмыс сапарына тоқтала келе:
— Франция елі делегациясының жұмыс сапарының негізгі мақсаты Семей қаласымен және оның тарихымен тереңірек танысу. Сонымен қатар алдағы уақытта өзара әріптестік орнатып, әртүрлі саладағы байланысты жетілдіруді көздеп отыр. Шаһарға келген бойды алдымен қазақтың ұлы ақыны Абайға құрмет көрсеттік. Мен қызметіме кіріскелі Абайдың барлық шығармаларын оқып келемін. Бізде Виктор Гюго, ағылшындарда Уильям Шекспир болса, ал сіздерде ұлы ақын Абайымен мақтанады, — деді Франсис Этьен.
Жиын барысында Франция мемлекетінің өкілдеріне бірқатар ұсыныстар айтылып, Семейдегі іргелі жобалар таныстырылды. Ал делегация жұмыс сапарының келесі күні қаланың кәсіпкерлерімен кездесті. Қалалық кәсіпкерлер палатасында өткен келелі басқосуда қос мемлекеттің өңіраралық әріптестігін дамыту тұрғысында сөз қозғалды. Айта кетейік, елшінің Шығыс Қазақстан облысына жасаған жұмыс сапары аптаның соңына дейін жалғасады.
Асан МЫРЗАХАН, «Семей таңы»
