Жексенбі күні Татар халқының ұлттық мерекесі Сабантой жылдағы дәстүр бойынша Түйемойнақ аралында өтті. Биыл 26-шы мәрте ұйымдастырылған атаулы мерекеде татар халқының әні шырқалып, ұлттық ойындарынан сайыс өтіп, келген ағайын тіл үйірер ұлттық тағамдардан дәм татты. Береке мен бірлікке бастайтын мерекеге Семей қаласының әкімі Ермак Сәлімов қатысты. Сондай – ақ Өскемен қаласындағы Ресей Федерациясының бас консулы Сергей Анненков та мерекенің құрметті мейманы болды.
Татар халқының ұлттық мерекесі Сабантой шаһарымызда тұрып жатқан түрлі ұлт өкілдерінің басын біріктіретін дәстүрлі мейрамға айналған. Мереке татар халқының көп жылдық дәстүрлерімен таныстырып, ұлт достығын нығайта түсуде. Мерекенің салтанатты ашылуында сөз сөйлеген Семей қаласының әкімі Ермак Сәлімов көп ұлтты елімізде ұлттардың достығы мен қарым-қатынасын сақтап, түрлі ұлт өкілдерінің бірлікте, ынтымақта өмір сүруіне барынша жағдай жасалып отырғанын атап өтті.
— Бүгін ынтымағы жарасқан, киелі өлкеде біз «Сабантой» мерекесін тойлаудамыз. Халқымызды бейбітшілік пен достыққа, береке-бірлікке шақыратын бұл мереке біздер үшін қымбат. Сондықтан баршаңызды құттықтап, мықты денсаулық, амандық тілеймін, — деп атап өткен Ермак Бидахметұлы, — Мемлекет басшысы Н.Назарбаевтың салиқалы, сарабдал саясатының нәтижесінде бүгінде елімізде татулық пен тұрақтылық сақталып келеді. Ел Тәуелсіздігінің 25 жылында Қазақстан халқы Ассамблеясын құру арқылы ұлттар достығының тамаша үлгісін әлемге таныта алған елміз. Біздің еліміз Қазақстандағы барлық ұлттардың, барлық ұлыстардың басын қосып, бүгінгі күні қазақ жерін өзінің ежелгі мекеніндей, туған еліндей көреді. Бұл — барлық ұлттарды бауырына басқан көңілі көлдей қазақ халқының жеткен жетістігі. Бүгін ынтымағы жарасқан қаламызда Сабантой мерекесін кезекті рет атап өтуде. Халқымызды бейбітшілік пен достыққа, салт-дәстүрін ұлықтауға шақыратын бұл мейрамның, барлық ұлттардың мерекелері сияқты, біз үшін алатын орны ерекше. Сондықтан да баршаларыңызды Сабантой мерекесімен құттықтаймын. Екінші кезекте сөз алған Ресей Федерациясының Өскемен қаласындағы бас консулы Сергей Анненков Консулдық атынан барша татар халқын ұлттық мерекемен құттықтап, мерекені жоғары деңгейде ұйымдастырылғанын атап өтті.
– Бұл мереке татар халқының ұлттық құндылығын әрі тарихын айшықтай түседі. Жыл сайын Сабантай мерекесін атап өту дәстүрі ұлғайып келеді және ұлттардың басын біріктіретін бірден – бір мереке екенін айта кетуіміз керек. Мереке әр отбасына қуанышын, жақсылығын алып келсін, — деп атап өтті Сергей Анненков.
— Сабантой мерекесі татар қоғамдық орталығы құрылғаннан бастап дәстүрлі түрде жыл сайын аталып өтіп келе жатыр, — дейді Татар өнер мектебінің директоры Ғабдулхақ Ахунжанов, — Сабантой — отбасылық мереке. Сабантой тек татар халқының ғана мерекесі емес. Ол барша ұлттардың басын қосып, халыққа қуаныш сыйлайды. Ең бастысы, халықтар арасында достық пен өзара түсіністікті қалыптастырады. Айтулы шараға Павлодар, Өскемен қалаларынан да мәртебелі меймандар қатысты. Ал мерекелік бағдарлама қаланың шығармашылық ұжымдары өз өнерлерін паш етті. Мерекенің көркін кіргізетін татар халқының ұлттық ойындары — татар күресі, арқан тарту, гір көтеру, қол күрес және тағы да басқа көптеген спорттық ойындар ойналды. Сабантойға келген қалалықтар татар ұлтының ұлттық тағамдарынан дәм татып, көркемөнерпаздар концерті мен фотокөрмені тамашалап, ойындарға қатысты.
Ерзат ЖАНАТҰЛЫ, «Семей таңы»
