Бейсенбі, 18 тамыз күні «Нұр Отан» партиясының Семей қалалық филиалының қоғамдық қабылдау бөлімінде Семей қаласының тұрғын үй-коммуналдық шаруашылығы бөлімі басшысының міндетін атқарушы Амантай Өтелбаев, тұрғын үй инспекциясының басшысы Светлана Заурбекова және Семей қаласының жолаушылар көлігі және автомобиль жолдары бөлімінің басшысы Юрий Пазына қабылдау жүргізудің кестесі шеңберінде азаматтарды жеке сұрақтары бойынша қабылдау өткізді.
Қабылдауға алғаш кіргендердің бірі Қабылтай Сегізбаев баспана мәселесімен келгенін айтты. 1998 жылдан бері тұрғын үй кезегінде тұрған ол ағымдағы жылдың мамыр айында ХҚКО-нан кезегінің 49 орында тұрғанын біледі. Ал шілде айында қайтара білгенінде 60 орынға сырғып кеткен. Осыны айтқан қала тұрғыны мәселенің мән — жайын анықтауды өтінді. Осы ретте сөз алған Семей қаласының тұрғын үй инспекциясының басшысы Светлана Заурбекова тұрғын үй кезегі жасалғаннан кейін өзгермейтінін, алайда прокуратура ұсынысымен кезектен алынған ата – ананың қамқорлығынсыз қалған жетім балалар қайта енгізілгенін атап өтті. Светлана Заурбекованың айтуынша, бұған дейін ондай азаматтар басқа өңірге көшіп кетуіне байланысты тұрғын үй комиссиясы шешімімен кезектен алынып тасталған. Сәйкесінше тұрғын үй кезегі де аздап жылжыпты. Алайда қадағалаушы орган өкілдері кезекте тұрған азаматтар басқа өңірге көшіп кеткен жағдай орын алса да, оларды кезектен алып тастауға ешкімнің құқығы жоқ екенін ескерткен. Осыған байланысты прокуратура ұсынысымен кезектен шығып қалған бірқатар жетім балалар тұрғын үй кезегіне қайта енгізілген. Қабылдауға келген азаматқа түсінік бере кеткен Семей қаласының тұрғын үй-коммуналдық шаруашылық бөлімі басшысының міндетін атқарушы Амантай Өтелбаев қала тұрғынына осы мәселе бойынша әкімдікке келіп, кезегінің жылжу себебіне анық көз жеткізуіне болатынын атап өтті. Ол сондай-ақ, қажет болған жағдайда жазбаша жауап беруге дайын екенін тілге тиек етті.
Қабылдауға келген келесі қала тұрғыны Рымжан Камалбекова туысы Алуа Ибрагимованың баспана мәселесімен келгенін айтты. Ол туысының көп балалы ана екенін, алайда тұрып жатқан баспаналарының апатты жағдайда тұрғанын жеткізіп, жергілікті билік өкілдерінен қол ұшын созуларын сұрады. Өз кезегінде Семей қаласының тұрғын үй-коммуналдық шаруашылық бөлімі басшысының міндетін атқарушы Амантай Өтелбаев мәселеден хабардар екенін айта келе, алдымен тәуелсіз сарапшылар арқылы тұрғын үйдің аппатты жағдайда екенін нақтылайтын сараптама жасату керектігін түсіндірді. Ол аталған құжат мәселені шешуге көмектесетінін, алдағы уақытта сала мамандары баспананы қарап шығатынына сендірді.
Қоғамдық қабылдауда жұртшылық тарапынан бірқатар мәселелер көтерілді. Атап айтқанда, қаладағы қоғамдық көлік қатынасы, ағаштардың заңсыз оталуы, пәтер иелері кооперативтерінің тиімсіз жұмыс жасауы мен ШҚ АЭК орнатқан жоғары кернеулі трансформатордың тұрғындардың денсаулығына тигізер әсері, Цементшілер кентін ыстық сумен қамтамасыз ету сынды бірқатар мәселелер көтерілді. Ашық түрде өткен кездесуде жергілікті билік өкілдері келіп түскен өтініштердің әрқайсысының жеке бақылауға алынатынын жеткізді.
Асан МЫРЗАХАН,
«Семей таңы»
