Семей қалалық әкімдігінде көпбалалы аналарға «Күміс алқа» төсбелгілері табыс етілді. ҚР Конституциясы күні қарсаңында ұйымдастырылған шараға қала әкімінің орынбасары Надежда Шарова, қалалық ардагерлер кеңесінің төрағасы Амантай Доғалақов, жұмыспен қамту және әлеуметтік бағдарламалар бөлімі басшысының міндетін атқарушы Азамат Құрманғалиев қатысты.
Бүгінгі таңда Семей өңірі бойынша 1 129 нәзік жанды «Күміс алқа» иегері. Енді олардың қатары тағы да алты ақ жаулықты анамен толықты.
— Құрметті алтын құрсақты аналар! Сіздерді ие болып отырған мәртебелеріңізбен құттықтаймын және алғыс айтамын. Өмірге перзент әкелу, оны тәрбиелеп өсіру үлкен жауапкершілікті қажет етеді. Сондықтан сіздерге зор денсаулық, отбасылық бақыт тілеймін,- деген қала әкімінің орынбасары өзінің жылы лебізін жеткізді.
«Ана» деген ұлы есім екендігін тілге тиек еткен қалалық ардагерлер кеңесінің төрағасы Амантай Доғалақов:
— Қазақтың заңғар жазушысы М.Әуезов: «Ана бір қолымен бесікті, бір қолымен әлемді тербетеді»,- деген. Ғалым да, батыр да, алып та анадан туады. Ананың ақ сүтінен қасиеті артқан еш нәрсе жоқ. Сондықтан «Күміс алқамен» тоқталып қалмай, «Алтын алқалы» ана атаныңыздар,- деп тілегін білдірді.
Алқа таққан аналарды мемлекеттік марапаттарымен құттықтаған жұмыспен қамту және әлеуметтік бағдарламалар бөлімі басшысының міндетін атқарушы Азамат Құрманғалиев төсбелгі иелеріне ай сайын 13 575 теңге мемлекеттік жәрдемақы тағайындалатынын мәлімдеді. Марапат иелері атынан сөз алған Жазық ауылының тұрғыны Тұрғайша Бекбосынова әр баланың өз ырыздығы барын, көп балалы ана болу үлкен бақыт екендігін айтты. Алты баласынан 7 немере, 6 жиен сүйіп отырған әже жас келіндер ұрпақ сабақтастығын жалғастырудан жаңылмасын деген тілегін жеткізді.
— Өмірге ұрпақ әкеу бір бақыт болса, көп балалы ана атану екі есе қуаныш. Қазіргі таңда мемлекет тарапынан қолдау зор. «Бір қозы туса, бір түп жусан артық шығады» деген сөз бар халқымызда. Құрмет көрсетіп отырған қала басшылығына, мемлекет басшысына алғысымыз шексіз. Еліміз тыныш, аспанымыз ашық болып, бейбіт аспан астында бақытты ғұмыр кешейік, — деп тілегін жеткізді Күміс алқа иегері.
Әйгерім СӘРСЕНҒАЛИ, «Семей таңы»
