Семейдің «Спартак» стадионында футболдан дәстүрлі «Достық» турнирі жалғасын тауып, биыл да жоғары деңгейде ұйымдастырылды. ҚР Спорт күні және ҚР Конституциясы күніне орай ұйымдастырылған спорт сайысына қала әкімдігінің аппараты, БАҚ өкілдері, кәсіпкерлер, «Шығыс» өңірлік әскери қолбасшылығы, сот жүйесі мен «Спартак» футбол клубының ардагерлерінен құралған алты команда қатысып, өзара мықтыны анықтады.
Сайыстың ашылуымен қала әкімі Ермак Сәлімов құттықтап, командаларға сәттілік тіледі.
— Бүгін шаһарымызда дәстүрге айналған «Достық» турнирін өткізіп отырмыз. Айта кетуіміз керек, сайыстың ауқымы жыл сайын кеңейіп келеді. Бұл өте жақсы. Өйткені спорт — денсаулық кепілі. Бүгінгі шараның негізгі мақсаты да көпшілікке дене шынықтырумен айналысуды насихаттау, өскелең ұрпаққа үлгі көрсету. Биылғы жылғы сайысқа, ардагерлермен қатар, жастарымыздың да көптеп қатысып отырғаны қуантады. Жалпы, қаламызда спорттың кез келген түрінен бұқаралық спорттық шаралар өткізу дәстүрге айналған. Қазір шаһарда әртүрлі спорт нысандары да көптеп салынуда. Оған қала кәсіпкерлері де өз үлестерін қосып жатыр. Баршаларыңызға тек жеңіс тілеймін,- деді қала әкімі Ермак Сәлімов.
Онымен қоса Семей қаласының прокуроры Марат Турубаев, облыстық мәслихат депутаты Борис Адианов, «Шығыс» өңірлік әскери қолбасшысы генерал – майор Нұрлан Қашағанов сөз алып, ізгі тілектерін білдірді. Кейін турнирдің бас төрешісі О.Багданов қатысушыларды футбол додасының басталуымен құттықтап, шараны өткізу тәртібімен таныстырды.
Алдымен 6 команда екі топқа бөлініп, өзара мықтыны анықтады. Екі топтан озып шапқан 4 команда жүлделі орындар үшін барын салды. Жүлделі үшінші орынға таласу үшін қаланың БАҚ өкілдері мен сот жүйесінің футболшылары кездесті. Тартысты өткен ойында бұқаралық ақпарат құралдарының командасы қарсыластарынан 1:0 есебімен басым түсті. Ал жеңімпаз «Шығыс» өңірлік әскери қолбасшылығы мен «Спартак» футбол клубының ардагерлері арасындағы ойында анықталды. Нәтижесінде «Шығыс» өңірлік әскери қолбасшылығының командасы пенальти сериясында 7:5 есебімен айқын басымдықпен жеңіске жетті.
Сонымен, чемпион атанған «Шығыс» өңірлік әскери қолбасшылығы ауыспалы кубокты иеленіп, медальмен, грамотамен марапатталды. Екінші және үшінші орын алған «Спартак» футбол клубының ардагерлері және БАҚ өкілдерінен құралған командалар да, тиісінше, медальдарға, грамоталарға ие болды. Айта кетейік, өткен жылғы дәстүрлі турнирде қала әкімдігі аппаратының командасы жеңіске жеткен болатын. Салауатты өмір салтын насихаттауды, жастар арасында футболды дамытуды мақсат еткен турнир бұл жолы да сәтті өтті.
Асан МЫРЗАХАН,
«Семей таңы»
