Семейдің облыстық тарихи – өлкетану музейінде ҚР Ұлттық музейінің бастауымен Тәуелсіздіктің 25 жылдығына орай ұйымдастырылған «Ұлттық музей сенің қалаңда» атты мәдени турдың ашылуы өтті.
Ұлттық музейдің айтулы шарасы осы уақытқа дейін Орал, Ақтөбе, Атырау, Ақтау, Қызылорда, Шымкент, Павлодар қалаларында ұйымдастырылып, өнерсүйер қауымның ыстық ықыласына бөленген еді. Мәдени турдың басты кейіпкері — Қазақ елінің брэндіне айналған «Алтын адам» жәдігері. Бұл жоба аясында мемлекет қорғауындағы, тек музей төрінде ғана тұратын асыл мұра өзге облыстар мен қалалардың тұрғындары және қонақтарының назарына ұсынылады. Ел тұрғындарының кемел тарихымызға деген сүйіспеншілігін оятып, жас буынның бойында патриоттық сезімді қалыптастыру шараның басты мақсаты болды. Семей қаласында өткен ауқымды іс-шара барысында көрермен қауым Ұлттық музейге «саяхат» жасап, рухани орда туралы видеороликтерді тамашалады.
Музейде өткен мәдени турға қатысқан қалалық мәдениет және тілдерді дамыту бөлімінің басшысы Берік Көпбаев іргелі жобаның өңірімізде бастау алып жатқанына ризашылығын білдірді.
— Биыл еліміздің Тәуелсіздігіне 25 жыл. Егемендіктің символы саналатын «Алтын адам» ұлылар еліне әкелінді. Баршаларыңызды осы бір айтулы мерекемен құттықтаймын. «Алтын адам» — Ұлттық музейдің басты жәдігері. Тәуелсіз Қазақстанның бұл жәдігері барша әлемді таң қалдырып отыр,- деді Берік Көпбайұлы.
Осыдан кейін қалалық ардагерлер кеңесінің төрағасы Амантай Доғалақов пен Семейдің облыстық тарихи – өлкетану музейінің директоры Бекен Теміров сөз алып, айтулы шараның мән-маңызы мен рухани мұраның құндылығына тоқталып өтті. Қазақстандағы Ұлттық музей – музей ісінің талаптары бойынша Азиядағы ең үлкен музей, нысан үлкендігі жағынан әлемдік ондыққа кіреді. Мәдени шарада салтанатты түрде ашылған еліміздің брендіне айналған «Алтын адам» жәдігері көрермен көзайымына айналды. Сонымен қатар көрермен назарына ұсынылған «Ұлттық музейге саяхат» видеороликтері де көпшілікке тың мәліметтер берді. Ұлттық музей — өткен тарихымызды байыптайтын, рухани мұрамызды зерделейтін аса ірі мәдени орталық. Отанымыздың бай тарихын түгендеу, салт-дәстүрін таныстыру, көнені көздің қарашығындай сақтау барша халықтың міндеті екендігін дәріптейтін жиында көпшілік қауым «Алтын адам» экспонатын қызыға тамашалады.
Ұлттық құндылықтарды насихаттайтын мега жоба алдағы уақытта еліміздің басқа да қалаларында ұйымдастырылмақ.
Асан МЫРЗАХАН,
«Семей таңы»
