Семей қалалық мәслихатының кезекті сессиясына дайындық барысында өндірісті дамыту, әлеуметтік инфрақұрылым мен тұрғын үй-коммуналдық шаруашылығы мәселелері бойынша тұрақты комиссия құрамындағы депутаттар бірқатар жылу нысандарын аралап, жылу маусымына дайындық барысымен танысты.
Қыс қыр астында. Жылу маусымына да бір айдан сәл асатын уақыт қалды. Осы ретте халық қалаулылары қысқы маусымға жылу беру нысандарының дайындығын көру мақсатында «Дорожник», 14-шағын аудан және №1 ЖЭО-да болып, қазандықтардағы мердігер мекемелердің жұмыстарын көрді.
«Теплокоммунэнерго» мекемесінің техникалық директорының орынбасары Аслан Оқасовтың айтуынша, «Дорожник» қазандығы өткен ғасырдың 80-ші жылдарында пайдалануға берілген. Оған 2015 жылдан бастап «Нұрлы жол» бағдарламасы аясында толықтай жөндеу жұмыстары жүргізілуде. Қазіргі таңда жұмыстың соңғы кезеңі атқарылуда. Жылыту маусымына дейін жөндеу жұмыстары аяқталып, тұрғын үйлерге уақтылы жылу беріледі деп жоспарланып отыр.
— Үш жарым шақырым жаңа жылу жүйесі тартылып, қуаты 1,8 гигакалория болатын ресейлік үш жаңа қазандық орнатылды. Нысанға барлығы 22 тұрғын үй қосылған. Орнатылған қондырғының қуаты барлық тұтынушыны сапалы жылумен қамтамасыз етуге мүмкіндік береді. Жылу жүйелері дайын. Жалпы, жылу беретін нысан қысқы маусымға дайын болады,- дейді «Дорожник» қазандығының басшысы Мұрат Бухаев.
Халық қалаулылары барған екінші жылу орталығы — 14 – шағын аудандағы қазандық.
Мұнда да «Нұрлы жол» бағдарламасы аясында жылу жүйелері, қондырғылары 1 қыркүйек күні толығымен аяқталуы керек болған. Осында жұмыс істеп жатқан «Ралли-С» мердігер мекемесі белгіленген жұмыстардың тек 70 пайызын ғана орындаған. Яғни, қалған 30 пайызы бір ай көлемінде еңсерілмесе, 1600-ден астам абоненттің мерзімінде жылуға қосылмай қалуы ғажап емес. Бұл жердегі келеңсіздікке куә болған депутаттар мердігер жұмысын сынға алып, тиісті шара қолдану керектігін мәлім етті.
— Бұл жағдайға қатысты біз өз тарапымыздан шара қолданамыз. Облыс әкімінің орынбасары Д.Гариков те қысқы маусымға дайындық барысын жіті қадағалап отыр. Келісімшарт жасасқан құжаттағы екі тарапқа жүктелген міндеттерді ескерген жөн деп ойлаймын. Онда жүктелген міндетті мерзімінде аяқтамағаны үшін, мердігер мекемеге айыппұл салу жағы қарастырылуы керек,- деді қалалық мәслихат депутаты, тұрақты комиссия төрағасының орынбасары Марлен Көкірекбаев.
Халық қалаулылары жауапсыз мердігер мекемеге қатысты шара қолданылатынын атап өтті.
Сонымен қатар депутаттар №1 ЖЭО-ның қысқы маусымға дайындық жұмыстарына да қанықты.
Әйгерім ЖАҚЫП, «Семей таңы»
