Өткен аптаның бейсенбісі, яғни 15 қыркүйек күні жеке және заңды тұлғалардың мәселелерін қарастырып, оларды шешуге көмектесу, қолдау көрсету мақсатында «Нұр Отан» партиясы Семей қалалық филиалының қоғамдық қабылдау бөлімінде Семей қаласы әкімінің орынбасары Николай Ушаков азаматтарды жеке сұрақтары бойынша қабылдады.
Қабылдауға «Нұр Отан» партиясы Семей қалалық филиалы қызметкерлері, Семей қаласының тұрғын үй-коммуналдық шаруашылық бөлімінің басшысы Марат Аленов, мемлекеттік тұрғын үйді есепке алу және бөлу мәселелері жөніндегі орынбасары Диана Шаяхметова және Семей қаласының тұрғын үй инспекциясының басшысы Светлана Заурбекова мен БАҚ өкілдері қатысты.
Қала әкімі орынбасарының қоғамдық қабылдауына жалпы саны жиырмадан астам адам жазылып, өздерін толғандырған сауалдарға нақты жауаптар алды. Келіп түскен өтініштердің дені қоғамдық маңызы бар мәселелер. Олардың басым бөлігі баспана мәселесіне қатысты болса, қалғаны әлеуметтік көмек көрсету мен өзге де мәселелер төңірегіндегі сауалдар.
Қабылдауға келгендердің бірі — тоғыз баланың анасы Айжан Бекмұхамбетқызы. Көпбалалы ана мемлекеттік тұрғын үй кезегінде екі жылдан астам уақыт тұрғанын айтып, пәтер алуға көмек сұрады. Айжан Бекмұхамбетқызы балаларының біразы оқу орындарында ақылы оқитынын, алайда әлеуметтік көмектен де қалыс қалып отырғанын жеткізді.
Аталмыш мәселе бойынша Семей қаласының тұрғын үй-коммуналдық шаруашылық бөлімінің мемлекеттік тұрғын үйді есепке алу және бөлу мәселелері жөніндегі орынбасары Диана Шаяхметова азаматшаның әлеуметтік қорғалғандардың тізіміне жататынын, алайда бүгінде ондай отбасылардың көп екенін айтып, баспананың тек заң аясында шешілетінін жеткізді. Дегенмен бөлім басшысының орынбасары алдағы уақытта «Қазақстан ипотекалық компаниясы» АҚ жалға берілетін тұрғын үйлерді пайдалануға беретінін, мүмкіндік болған жағдайда, бөлімге хабарласып, сол үйлерге өтініш беріп көруге болатынын жеткізді.
Келесі кезекте қабылдауға жүгінгендердің бірі Ресей Федерациясының азаматшасы Людмила Скулкина болды. Кезінде елімізден көшіп кеткен азаматша Семейде қайтыс болған анасының пәтерін жекешелендіруге көмек сұрады. Белгілі болғандай, Людмила Скулкинаның анасы 2014 жылдың соңында Энергетик кентінен жалдамалы пәтерге ие болады. Алайда анасы жылжымайтын мүлікті өз атына аударып үлгермей өмірден озыпты. Аталған мәселемен жүгінген пәтер иесінің жалғыз қызы Людмила Скулкина анасының пәтерін жекешелендіруге көмек сұрады. Бұл тұрғыда сөз алған Семей қаласы әкімінің орынбасары Николай Ушаков аталған мәселені қалалық тұрғын үй комиссиясы шешетінін, барлық құжаттарды тапсырып, тек күту қажеттігін айтты.
Қабылдауға келген барлық азаматтардың сұрақтары бойынша Николай Ушаков қолданыстағы Қазақстан Республикасының заңдарына сәйкес жауап беріп, азаматтардың өтініш-ұсыныстарын негізге ала отырып, әрбір азаматтың арызының дәйектілігін мұқият зерделеп, өзі бақылауға алатынын жеткізді.
Асан МЫРЗАХАН, «Семей таңы»
