Семейде республикалық «Әділет кеңес береді» акциясы өтті. Соңғы жылдары қолға алынған бұл акцияның өтуі дәстүрге айналған. Акция аясында Әділет министрлігінің барлық ведомстволарының өкілдері халықпен кездесу өткізіп, туындаған мәселелер бойынша кеңестер береді.
Өткен аптаның соңғы жұмыс күні «Нұр Отан» партиясының Семей қалалық филиалында «Әділет кеңес береді» республикалық акциясы аясында азаматтарды құқықтық сұрақтары бойынша қабылдау өткізілді. Шара аясында қалалық әділет басқармасы қызметкерлері, адвокаттар мен нотариустар тұрғындарға жан-жақты құқықтық көмек көрсетіп, заңнама нормаларына түсініктеме және кеңестер берді.
Қабылдауға алғаш келгендердің бірі Семей қаласының тұрғыны Анатолий Гурторенко өзінің жақсы танысынан гараж сатып алғанын, алайда жылжымайтын мүлікті танысы әлі күнге дейін өз атына жекешелендіруге мүмкіндік бермей жүргенін айтып жүгінді. А.Гурторенконың айтуынша, ол осыдан он төрт жыл бұрын сатып алған нысанды рәсімдемеген, ал нысанды сатқан танысы ешқандай құжат бермепті. Құжаттарының дұрыс болмағанын алға тартқан танысына соңғы рет барғанда, жылжымайтын мүлікті ұлының атына аударып жібергенін айтқан екен.
— Ол кезде ауызша келісіп, бір-бірімізге сенім білдірген едік. Алғашқыда ол құжаттарының дұрыс емес екенін, оны рәсімдейтінін айтқан болатын. Содан бері қаншама уақыт өтті. Ауладағы көршілерім куә бола алады. Сотқа жүгінгеніммен, құжаттарымның жоқтығын айтып қабылдамады,- деді Анатолий Гурторенко.
Осы ретте «Нұр Отан» партиясы Семей қалалық филиалы төрағасының бірінші орынбасары Зульфия Жамалтдинова қабылдауға қатысып отырған адвокаттардан осы шағымға қатысты түсінік берулерін өтінді. Сала мамандары сексеннен асқан қарияға мәселені алдымен бейбіт жолмен шешіп көруге кеңес берді. Ал одан ешқандай нәтиже шықпаған жағдайда, қалалық ІІБ-на шағымданып, алаяқтық фактісі бойынша іс қозғауға болатынын жеткізді. Ал кәсіби медиатор Марат Тайғұлов, мәселені бейбіт жолмен шешу үшін, алдымен өзіне жүгіну қажет екендігін айтып, медиация мүмкіндіктері жайлы баяндап берді.
Акция аясында қабылдауға келген азаматшаның бірі — Динара Хабидулина. Оның айтуынша, қала тұрғыны жер телімін алғанда, «Қазгипрозем» мемлекеттік мекемесі жердің аумағын қате белгілеген, соның салдарынан құрылыс жұмыстарын өзгенің жеріне жүргізген. Дегенмен отбасылы Хабидулиндер өздеріне тиесілі жерді сатып, құрылыс жүргізген жерді иесінен сатып алған. Қабылдауға келген Динара Хабидулина мемлекеттік органның қателігінен орын алған шығынды аталған мекеменің өтеп беруін талап етіп отырғанын айтты. Сондай-ақ, Динара Хабидулинаның айтуынша, «Қазгипрозем» мекемесі алғашқыда қателіктерін мойындағанымен, кейіннен оны жоққа шығарып отырған көрінеді. Осы орайда кеңес берген мамандар мәселенің жай-жапсарын тек құқық қорғау органдары ғана анықтайтынын тілге тиек етіп, азаматшаға сотқа жүгінуге кеңес берді.
Бұл жолғы қабылдауға келген тұрғындар, негізінен, құқықтық мәселелер бойынша көмек сұрай келгендер. Оның сыртында әлеуметтік мәселелер де қаралды. «Нұр Отан» партиясының Семей қалалық филиалының өкілдерінің айтуынша, республикалық «Әділет кеңес береді» акциясы халықтың заң сауаттылығын көтеруге және оларға қызығушылық туғызатын сұрақтар бойынша жауап алуға мүмкіндік береді. Шараның негізгі мақсаты азаматтардың азаматтық санасын және заң алдындағы жауапкершілігін көтеру үшін тұрғындар арасында консультативтік жұмыс жүргізу және кең көлемді құқықтық көмек көрсету болып табылады.
Асан МЫРЗАХАН,
«Семей таңы»
