Сәрсенбі, 5 қазан күні Семей қалалық мәслихатының кезектен тыс алтыншы сессиясы өтті. Сессия жұмысына қала әкімі Ермак Сәлімов, қала әкімі аппаратының басшысы Зәуреш Исабаева мен қала әкімінің орынбасарлары, қалалық әкімдіктің дербес салалық бөлім басшылары мен БАҚ өкілдері қатысты.
Сессия күн тәртібінде екі мәселе қаралды. Алдымен Семей қаласының тұрғын үй-коммуналдық шаруашылық бөлімінің басшысы Марат Аленов Семей қаласы бойынша коммуналдық қалдықтардың пайда болуы және жинақталу нормаларын бекіту туралы қалалық мәслихаттың 2014 жылғы 5 наурыздағы шешіміне өзгерістер енгізу туралы баяндады. Сессияда қаралған екінші мәселе де аталған салаға қатысты болды. Мінберге көтерілген тұрғын үй-коммуналдық шаруашылық бөлімінің басшысы Марат Болатұлы мәслихаттың 2015 жылғы 18 наурыздағы Семей қаласы бойынша коммуналдық қалдықтарды жинау, шығару және көмуге арналған тарифтерді бекіту туралы шешіміне енгізіліп отырған өзгерістерді қолдауын сұрады. Бөлім басшысы қолданыстағы заңның өзгеруіне байланысты «коммуналдық қалдықтар» сөз тіркесінің «қатты тұрмыстық қалдықтар» сөзіне ауыстырылғанын атап өтті. Сессияда көтерілген сұрақтарды қалалық мәслихат депутаттары бір ауыздан қолдады және шешім шығарды.
«СТ — ақпарат»
