Жылуға берешегі бар семейліктер пәтерлерінің есіктерінен айырылуы мүмкін. Бұл туралы сәрсенбі күні арнайы жүргізілген рейд барысында Семей қаласының әкімі Ермак Сәлімов мәлім етті. Белгілі болғандай, 5 қазан күнгі жағдайға сәйкес, «Теплокоммунэнерго» мекемесіне қала тұрғындарының қарызы 318, 6 млн. теңгені құрайды.
Аталған қарыздың 249,6 млн. теңгесі жеке тұлғалардың еншісінде екені анықталды. Осы ретте аймақ басшысы Даниал Ахметов ағымдағы жылдың мамыр айынан бастап «Теплокоммунэнерго» мекемесінің кредиторлық және дебиторлық қарызын азайтуға қатысты бірқатар тапсырмалар жүктеген. Жауапкершіліктен жалтарып, жылуға берешегін бермей жүргендермен күрес сол мамыр айынан басталған болатын. Міне, қоңыр күзге дейін аталмыш жұмыс жалғасын тауып келе жатыр. Ал сәрсенбі, 5 қазан күні ұйымдастырылған рейдке қала әкімінің өзі де араласты. Рейдке учаскелік полиция инспекторлары, жеке сот орындаушылары және өзге де жауапты ведомстволар өкілдері тартылды. Айта кетсек, мамыр айында жылуға қарыздың көлемі 767, 4 млн. теңге мөлшерінде болыпты. Алайда кешенді жүргізілген шаралардың нәтижесінде бұл көрсеткіш біршама төмендеді. Десе де бүгінгі күні жеке сот орындаушыларының қолында «Теплокоммунэнерго» мекемесіне қатысты бекітілген мерзімде орындалмай отырған 1700-ден астам сот орындау парақтары бар болып шықты. Берешекке белден батып, оны өтеуге асықпаған тұрғындарды жазалау мақсатында құзырлы орган мамандары шұғыл қадамдарға баруға мәжбүр болып отыр. Атап айтқанда, сот шешіміне сәйкес, борышкерлердің жеке мүлкі ретінде пәтерлердің сыртқы есіктерін шешіп алу көзделіп отыр екен.
— Қаладағы барлық жылу орталықтары ағымдағы жылыту маусымына дайын. 17 жылу пунктінің 10-ы өз жұмысын бастап отыр. Бұл орайда жылу қуатына ең алдымен әлеуметтік нысандар қосылғандығын атап өткім келеді. Олардың қатарына медициналық мекемелер, мектептер, балабақшалар мен интернаттар кіреді. Көмір қоры жеткілікті. Біздің жұмысымызды тек қана жылуға қарызы бар жеке тұлғалар кешеуілдетуде. Жеке сот орындаушылармен кездестік. Олар жауапсыз абоненттерге қатысты 2 мыңға тарта іс қозғалғанын айтты. Заңгерлермен кеңесе отырып, борышкерлердің жеке мүлкі ретінде пәтерлерінің сыртқы есіктерін тәркілеуге бел будық,- деп нақтылап атап өтті Ермак Бидахметұлы.
Анықталғандай, биыл шаһардағы тұрғын үйлердің 86%-ы жылуды қабылдауға дайын. Ал жылыту науқанына дайындық төлқұжаты тұрғын үйлердің 70%-да бар екен. Аталмыш рейдтің нәтижесінде Бөгенбайұлы, Узбекская және Дулатов көшелері мекенжайы бойынша тұратын абоненттерден жылу берешегінің басым бөлігі өндірілді.
Қала басшысы бұл бағыттағы жұмыстар алдағы уақытта да жалғаса беретінін атап өтті.
Жақсылық МҰРАТҚАЛИҰЛЫ,
«Семей таңы»
