Қазақстан Республикасы Тәуелсіздігінің 25 жылдығына орай, 8 — 9 қазан күндері «Қуатты өңір – қуатты Қазақстан» акциясы аясында Астана қаласында Шығыс Қазақстан облысының күндері өтеді. Көрмелер, қойылымдар, концерттік бағдарламалар мен ауыл шаруашылығы өнімде-рінің жәрмеңкесінен тұратын іс-шаралар елордалықтарға ел Тәуелсіздігінің 25 жылында облыстың экономикалық және мәдени салада жеткен жетістіктері жайлы баяндайды.
Қазақстан Республикасының Президенті — Елбасы Нұрсұлтан Назарбаевтың саясатын ұстанған Шығыс Қазақстан облысы 25 жылда әлеуметтік-экономикалық, өнеркәсіп, ауыл шаруашылығы, мәдениет және спорт салалары бойынша жарқын жетістіктерге жетті.
Атап айтсақ, 25 жыл ішінде жалпы өңірлік өнім көлемі 8,8 миллиард теңгеден 2,3 триллион теңгеге дейін, немесе 260 есе өсті. Жалпы ішкі өнім, тұрғындар санына шаққанда, 5 мың теңгеден 1656,2 мың теңгеге дейін, немесе 330 есе ұлғайды.
Ел Тәуелсіздігінің 25 жылы ішінде өңірде 150 білім нысаны салынды, оның ішінде 129 мектеп, 21 балабақша бар. 100-ден астам денсаулық сақтау нысандары ашылды. Олардың қатарында 17 аурухана, 28 ауылдық дәрігерлік амбулатория, 7 медициналық пункт, 13 стоматологиялық клиника бар. Мұнымен қоса 40 мәдениет нысаны ашылды, оның ішінде 11 Мәдениет үйі, 5 Достық үйі, 10 саябақ, 3 мұражай бар. Спорт саласында 300 жаңа нысан пайдалануға берілсе, оның ішінде17 сауықтыру кешені, 139 футбол алаңы, 137 хоккей қорапшасы, 2 ипподром, 3 хоккей модулі, Жекпе-жек сарайы, теннис корты, жеңіл атлетикалық манеж, орталық жабық жүзу бассейні, спортқа дарынды балаларға арналған мектеп-интернат, тау шаңғысы кешені ашылды.
Өңірде іске асырылып жатқан жобалар тек дамуды ғана емес, бастысы, халықтың жағдайын жақсартып, біртектілікті нығайтып, бейбітшілікті сақтауға бағытталуда.
2016 жылғы 8 қазанда «Көрме» орталығында Шығыс Қазақстан облысының Берел қорымы, Шілікті обасы сынды бірқатар тарихи орындардан табылған құнды археологиялық артефактілердің көрмесі, Қазақстан Республикасының Ұлттық музейінде өңірдің бай мәдени өмірін таныстыратын «Шығыс Қазақстан суретшілері. Уақыт портретіне штрихтер» және «Үлкен жол кезеңдері» тақырыбындағы сурет және фото көрмелері, Қазақстан Республикасының Ұлттық Академиялық кітапханасында «Тәуелсіздіктің жарқын жетістіктері: Шығыс Қазақстан» атты кітап көрмесі, театрсүйер қауымға дәл осы күні Л.Гумилев атындағы Еуразия ұлтттық университетінде Өскемен қаласындағы облыстық драма театры сахналайтын К.Людвигтің «Жұлдызды сәт» қойылымы және Семей қаласының Абай атындағы облыстық театры ұсынатын Ф.Достоевскийдің «Дядюшкин сон» атты спектаклі көрсетіледі. «Қазақстан» спорт сарайында «Торпедо» және «Астана» балалар хоккей командалары арасындағы достық турнирі, «Барыс» хоккей клубының белді ойыншысы Талғат Жайлауовтың қатысуымен балаларға хоккейден шеберлік сағабы өткізіледі.
Қазан айының 8-9 күндері «Хан Шатыр» сауда ойын-сауық орталығының алаңында «Қазақстанда жасалған» атты ауыл шаруашылығы өнімдерінің жәрмеңкесі ұйымдастырылатын болады. Жәрмеңкеде елорда тұрғындарына 300 тоннаға жуық түрлі ауыл шаруашылығы өнімдері ұсынылмақ.
Екі күн бойы «Көрме» орталығында Шығыс Қазақстан облысының жетістіктерін паш ететін «Бейбітшілік пен жасампаздықтың 25 жылы» атты бұйымдар мен өнімдердің көрмесі өтеді. Сондай-ақ іс-шара барысында Ә.Қашаубаев атындағы облыстық филармония ұжымы келушілерге көтеріңкі көңіл-күй сыйлау мақсатында екі күндік мәдени концерттік бағдарламасын ұсынады.
Шығыс Қазақстан Аймақтық
коммуникациялар қызметі.
