Семей қаласының әкімі Ермак Бидахметұлы Сәлімов қалалық ТҮКШ бөлімі қызметкерлерімен және көше жарығын қамтамасыз ететін мердігер мекемелер басшыларымен арнайы жиын өткізді. Жиында ТҮКШ бөлімінің басшысы Марат Аленов ағымдағы қалыптасқан жағдай туралы баяндады. Атап айтқанда, 2017 жылға белгіленген қала көшелерін жарықтандыру бойынша жоспарланған жұмыстардың жайы қарастырылды. Ермак Бидахметұлы аталмыш мәселені бақылауда ұстап, көшелердің санын, сондай-ақ олардың жалпы жүктемесімен қатар, қала тұрғындарының тілегін де естен шығармауды тапсырды. Сонымен қатар көше жарығының түнгі уақыттағы кестесі талқыланып, қала әкімі шаһардағы шамдарды таңғы сағат 8.00-ге дейін сөндірмеуді тапсыра отырып, оларды қараңғы уақыттың жалғасуына байланысты реттеуді жүктеді. Айта кетсек, Ермак Сәлімовтің «Facebook» әлеуметтік желісіндегі ресми парақшасында қала тұрғындары жарық мәселесіне қатысты пікірлерін білдірген болатын. Осы ретте қала басшысы түнгі көше жарығын қараңғы түскен уақыттан таңғы 7.00-ге дейін жанып тұруды тапсырса, тұрғындардың өтінішімен, енді таңғы сағат 8.00-ге дейін жанатын болды. Өз кезегінде Ермак Сәлімов қалалықтардың сын-пікірлері жергілікті атқарушы органдардың жұмысына оң әсерін тигізуі керектігін де ескертіп өтті.
Семей қаласы әкімінің баспасөз қызметі.
