Абай атындағы мемлекеттік қазақ музыкалы-драма театрында Қазақстан Республикасы Тәуелсіздігінің 25 жылдық мерейтойына орай салтанатты жиын болып өтті. Семей қаласының әкімі Ермак Сәлімов қатысқан мерекелік шарада түрлі салада өңірдің өркендеуіне сүбелі үлестерін қосқан бір топ азаматтарға, мерейтойлық медальдармен қатар, Семей қаласының Құрметті азаматы атағы табысталды.
Салтанатты жиынға Тәуелсіздіктің алғашқы жылдары Семей өңірінің әлеуметтік – экономикалық дамуына күш салған қоғам қайраткерлері, денсаулық сақтау және құқық қорғау органы мамандары, Қарулы Күштер өкілдері, соғыс және еңбек ардагерлері, сондай-ақ мәдениет пен спорт саласының үздік майталмандары, зиялы қауым өкілдері жиналды. Қала әкімі Ермак Сәлімов еліміздің ширек ғасырлық тарихына тоқталып, осы 25 жыл ішінде семейліктердің жеткен жетістіктері мен табыстарына көз жүгіртті.
— Құрметті жерлестер, ардақты ағайын! Баршаңызды ұлы мереке — Тәуелсіздік күнімен шын жүректен құттықтаймын. Бұл бабалар аңсаған арманның орындалған күні болып саналады. Тәуелсіздік — болашақтың бастауы. 25 жыл ішінде халқымыз Елбасы Нұрсұлтан Әбішұлы Назарбаевтың саясатын қолдап, дамудың даңғыл жолына түсті. Жасампаз еңбектің арқасында экономика жақсарып, Қазақстан қуатты мемлекетке айналды. Президент «Қазақстан – 2050» Стратегиясында «Мәңгілік Ел» идеясын ұсынды. Оны орындау үшін татулықты сақтап, аянбай еңбек ету қажет. Бірлігі берекелі, тірлігі мерекелі Семей халқы әрқашан да Мемлекет басшысы қойған міндеттерді лайықты орындап келеді. Алдымызда ұлы мақсаттар тұр. Жарқын болашақты ұрпаққа табыстап, Қазақстанды дамыған елдердің қатарына қосу жолында баршаңызға сәттілік, амандық және толағай табыстар тілеймін. Егемен ел қуанышы құтты болсын,- деді Ермак Бидахметұлы
Бұдан кейін қала әкімі Елбасының Жарлығымен бекітілген «Қазақстан Республикасының Тәуелсіздігіне 25 жыл» мерейтойлық медалін табыстау рәсімін өткізді. Аталмыш марапатқа ие болғандардың қатарында соғыс ардагері, ШҚО-ның Құрметті азаматы Ғабдулғазиз Ахмеров, мүмкіндігі шектеулі жандар арасындағы шахматтан Әлем чемпионы Болат Қабжанов, Семей қаласы перинаталды орталығының дәрігері Гүлжазира Дүйсекенова, «Чернобыль мүгедектері» ерікті қоғамының төрағасы Вениамин Слетников, кикбоксингтен әлемнің төрт дүркін чемпионы Бауыржан Құдайбергенов және өзге де салалардың үздіктері болды. Сонымен қатар шара барысында Семей қаласының Құрметті азаматы атағы ҰҚК-нің ардагері, генерал-майор Қамза Ибраевқа, ІІМ-нің еңбек сіңірген ардагері, юстиция генерал-майоры Рүстем Қайдаровқа және СММУ-дің құрметті профессоры, медицина ғылымдарының кандидаты Тәңірберген Тоқтаровқа берілді. Өз кезегінде марапат иегерлері осындай құрметке лайық деп танылғандарына алғыстарын білдіріп, Тәуелсіздік жылдарындағы жылы естеліктерімен бөлісті.
Жақсылық МҰРАТҚАЛИҰЛЫ,
«Семей таңы»
