Семей қалалық ІІБ қылмыстық істерді тергеу бөлімінің аға лейтенанты Нұржан Өскенбаев 15 жасар қызды өлімнен алып қалды.
12 қаңтар күні түс уақытында жұмыс бабымен «Әуезов» полиция бөлімшесінен шыққан аға лейтенант Нұржан Өскенбаевтан бұрыннан таныс Ержан есімді аула сыпырушысы көмек сұраған. Дәлірек айтқанда, аула сыпырушысы 8-ші қабаттан бір қыздың секіргелі тұрғанын жеткізген. Бұл оқиға «1000 ұсақ — түйек» ауданындағы жаңадан салынған тұрғын үйлердің бірінде болған.
Дереу тұрғын үйдің алдына жеткен полиция қызметкері 8-ші қабатта қатты жылап тұрған қыз баланы көрген. Ол әуелі жедел көмек көрсету орындарына хабарласып, жәрдем сұрауды жөн көрген. Өзімен бірге ұялы телефоны болмағандықтан, көшедегі бейтаныс жанның қалта телефонынан 102-ге хабарласып, болған жайды түсіндіріп, оқиға орнына тез жетуді сұраған.
-Үйдің алдына жақындап келгенде, нақты ажырата алмадым, әйтеуір, әйел адамның жылап тұрғанын және секіруге оқталғанын байқадым. Жақындап келгенде оның мектеп формасын киген жас қыз екенін білдім,- дейді Нұржан Өскенбаев.
Осыдан соң ол хабарлама бойынша оқиға орнына жеткен аймақтың екі полицейімен бірге жоғары көтерілген. Полиция қызметкерлерінен 3-4 метр ғана қашықтықта тұрған қыз өз-өзіне қол жұмсағысы келетінін, жақындамауын өтінген.
— Бізбен аздап тілге келген қыздан есімін сұрадық. Есімін айтты. А. есімді қыздан не болғанын сұрап едік, жауап бермеді, тек жылап тұрды. Бізден жақын келмеуді сұрады. Амал жоқ, сыртқы киімімді шешіп, үйдің алдына барып, жерге отырдым. Өзімді оны терезеден көріп қалған көрші ретінде таныстырдым. «Саған не болды? Менің де сен секілді қызым бар, кішкентай ұлым бар. Оларды тастап, саған жүгіріп келдім. Енді тоңып отырмын. Болған жайды түсіндір, сабыр ет»,- деп, қызбен тілдесудің амалын жасадым. Себебі ол қайта-қайта алдыға қарай ұмтылып тұрды,- дейді Нұржан.
Осыдан соң қалған екі полиция қызметкері қыздың артынан келіп ұстап, құтқарып қалған.
Ал қыз болса жедел жәрдем көлігінде «хочу к апашке», «әжем түсіме кіріп жүр» деген сөздерді айтқан. Полиция қызметкерлерінің түсінуінше, қыздың әжесі қайтыс болған, қазір ол тек анасының ғана тәрбиесінде.
Жадыра ТӨЛЕГЕНҚЫЗЫ,
Семей қаласы.
