Аптаның сейсенбісінде ел көлемінде «Бизнестің жол картасы — 2020» бағдарламасы бойынша мемлекеттік қолдауды алу мәселелеріне қатысты азаматтарды бірыңғай қабылдау күні акциясы ұйымдастырылды. Шаһардағы «Нұр Отан» партиясының Семей қалалық филиалында өткен шараға филиал төрағасының бірінші орынбасары Зульфия Жамалтдинова, кәсіпкерлік бөлімнің басшысы Марат Нүгеров, «Даму» кәсіпкерлікті қолдау қорының өкілдері, өз бизнесін ашқысы келетін азаматтар мен кәсіпкерлер қатысты.
Акцияның мақсаты «Бизнестің жол картасы — 2020» бағдарламасын іске асыруды қамтамасыз ететін мемлекеттік органдар мен даму институттарының азаматтарға, шағын және орта бизнес өкілдеріне пікірталас алаңын ұсыну болатын.
Ашық есік күнінде Семей қаласы кәсіпкерлік бөлімінің басшысы Мұрат Нүгеров шаһарда бизнесті бастау және жүргізу үшін қолайлы жағдай жасалғанын атап өтті. Сондай-ақ қала қазынасына түсетін салықтық түсімдердің 50 пайызынан астамын шағын және орта кәсіпкерлік қалыптастырып отырғанын айтқан Марат Нүгеров мемлекеттік бағдарламаның жүзеге асырылу барысына жан-жақты тоқталды.
— «Бизнестің жол картасы — 2020» бағдарламасы кәсіп ашу және оны өркендету жолында толыққанды жүзеге асырылуда. Жыл сайын бағдарлама арқылы кәсіп ашып, нәсіп тауып отырған тұрғындар қатары артуда. Мысалы, өткен жылы 55 мың адам кәсіпкерлік салада еңбек етсе, бұл көрсеткіш ағымдағы жылы 57 мыңға жеткен. Бұл қаламыздағы әрбір жетінші адам осы салада екенін көрсетеді,- деп атап өткен бөлім басшысы бүгінде жеңіл өнеркәсіп те қанат жайып келе жатқанын жеткізді.
Бұл ретте Марат Мұратбекұлы бағдарлама бойынша, салыстырмалы түрде айтқанда, өткен жылы Өскеменнен 54 жоба, Семейден 64 жоба ұсынылғанын тілге тиек етті. Жеңіл өнеркәсіпті дамытумен қоса, аймақ бойынша әлі қолға алына қоймаған тың істердің де (мысалы, электр тасымалдаушы бағандар дайындау) игеріліп жатқандығы бағдарлама жемісі екендігін мәлімдеді.
Қала кәсіпкерлігі жайлы ақпарат берілген соң, «Бизнестің жол картасы — 2020» бағдарламасы арқылы несие алу жолдары да жан-жақты түсіндірілді.
— «Бизнестің жол картасы-2020» — шағын және орта бизнесті дамытуға бағытталған Қазақстандағы нәтижелі бағдарлама. Семей қаласында субсидия беруге 213 жоба бекітілген. Ол аймақ бойынша берілген жобалардың үштен бір бөлігін құрайды,- деген ШҚО бойынша «Даму» қорының аймақтық филиалының директоры Тимур Екеев бағдарламаның жүзеге асырылуы ойдағыдай деген пікірін білдірді.
Сондай-ақ кәсіп ашуға қадам жасаған әрбір тұрғынға шаһарда орналасқан «Даму» қорының кеңсесінде мамандар, тұшымды ақпарат берумен қоса, құжаттарды рәсімдеуден банкке дейінгі аралықта тегін кеңес ұсынатынын атап өтті. Ал қала маңындағы ауыл-аймақтарға қордың көшпелі тобы барып, түсіндіру жұмыстарын жүргізіп отырады екен.
Акция аясында бағдарлама бойынша қаржы қандай салаларға бөлінетіндігі айтылып, болашақ кәсіпкерлерге бағыт-бағдар берілді.
Әйгерім СӘРСЕНҒАЛИ, «Семей таңы»
