«Жер бетіндегі жақсылықтың барлығы ананың сүтінен тарайды»,- деп Мемлекет басшысы айтқандай, аналарымызға деген құрмет қай кезде болмасын биік, олардың алар орны ерекше болған.
Қасиетін ақ сүтімен перзент бойына дарытқан ақ жаулықты аналарымыз біздер үшін үлгі-өнеге, даналықтың маржанындай. Шырайлы көктемнің алғашқы аптасында келетін 8 Наурыз — Халықаралық әйелдер мейрамы күн шуағын молайтып қана қоймай, айналамызға жылулық пен жайдары көңіл-күй сыйлайды. Халықаралық әйелдер мерекесі қарсаңында сый-сияпатсыз қалатын апа-әже, қыз-келіншек кемде-кем болар. Аягөз ауданында жалғасын тауып келе жатқан игі дәстүр бар. Жыл сайын әр салада еселі еңбек етіп, ауданның дамуына сүбелі үлес қосқан, қазірде жемісті еңбегімен ерекшеленіп жүрген нәзік жандыларды құттықтау мақсатында Аягөз ауданы әкімінің қабылдауы ұйымдастырылады. Бұл жолы да аудан әкімінің қабылдауына бел жазбай тылда қызмет еткен әжелеріміз, көпбалалы аналар, кәсіпкерлер мен мекеме қызметкерлері, зейнеткер аналарымыз бен басқа да қызмет саласында белсенділік танытып жүрген азаматшалар бас қосты. Алғашқы құттықтау сөз кезегін аудан әкімінің орынбасарлары Нүкібаев Бауыржан Молдағалиұлы мен Сүлейменов Болат Серікқазиұлы алып, аналарымыз бен ару қыздарымызды мерекелерімен құттықтап, аудан әкімінің сый-сияпаттарын тапсырды.
Көңілді жиын барысында аудандық «Қозы Көрпеш — Баян сұлу» Мәдениет үйі әртістері ардақты аналарымызға ән мен биден шашу шашып, тамаша көңіл-күй сыйласа, жасы үлкен аналарымыз ақ батасы мен алғыстарын жолдап, жүрекжарды лебіздерін білдірді. «Көктемнің ең алғашқы мерекесі әйелдер күні мерекелеріңіз тағы құтты болсын, аяулы жандар! Сіздерге зор денсаулық, еңбектеріңізге жеміс, отбасыларыңызға бақыт тілейміз!»,- деп тілек айтып тарқасты.
Гүлмира ҚАЛИЕВА,
«Семей таңы»
