Өткен сәрсенбі, 15 наурыз күні Шығыс Қазақстан облысының әкімі Даниал Ахметов жұмыс сапарымен Аягөз ауданында болды. Даниал Кенжетайұлының Аягөз ауданына жасаған сапарының негізгі мақсаты аудан орталығында салынып жатқан мектептердің құрылыс жұмысымен танысу болатын.
Бүгінгі таңда Аягөз ауданы аймақ бойынша жоғары әлеуметтік – экономикалық көрсеткіштермен алдыңғы сапта келе жатқан өңір. Әсіресе ауданда құрылыс саласында қарқын бар. Бұл өз кезегінде аудан орталығын ажарландырып, елдің еңсесін көтеруге септігін тигізуде. Ал, заманауи, бүгінгі талапқа негізделген мектептер білімді ұрпақ тәрбиелеуге жаңаша жол ашпақ.
Облыс әкімі Даниал Ахметов іссапары аясында өткен жылдың соңына қарай іргетасы қаланып, құрылысы басталған 600 орындық мектептің, сондай-ақ ішкі жөндеу жұмыстары жүргізіліп жатқан №3 жалпы орта білім беретін мектептің жағдайымен жан-жақты танысты.
Аягөз ауданының әкімі Бақытжан Байахметов аймақ басшысын атқарылып жатқан жұмыс барысымен таныстырып, құрылыс сапасына баса назар аударылып отырғанын баяндады.
Сапар барысында аймақ басшысы жаңа мектеп құрылысының қарқыны жақсы екенін, алдағы уақытта да білім ошағының құрылысы бақылауда болатынын атап өтті.
Ішкі жөндеу жұмыстары аяқталған №3 жалпы білім беретін орта мектепті де аралап көрген облыс басшысы жөндеу жұмыстарына оң баға берді.
Іссапарын қорытын-дылаған аймақ басшысы атқарылып жатқан жұмыстарға көңілі толатындығын айтып, аталған нысандардағы жұмыстарды уақтылы аяқтап, мерзімінде тапсыруды жүктеді.
Гүлмира ҚАЛИЕВА,
«Семей таңы»
