Невзоровтар отбасы атындағы Шығыс Қазақстан облыстық бейнелеу өнері музейінде «Дала аңызы» атты көрме вернисажы өтті. Оның авторы – Қазақстан Суретшілер, Дизайнерлер және Қолөнершілер одағының мүшесі, Фаберже орденінің иегері Аман Мұқажан.
Көрме вернисажына қойылған әрбір жәдігер мұражайға келген қалалықтар мен қала қонақтарын таңғалдырып, бұл өнерге деген қызығушылықтарын арттыра түсті. Көрмеге қойылған 240-тан астам туындының әрқайсысы өзіндік ерекшеліктерімен дараланады. Мысалы, бағалы тастармен әшекейленген күміс және алтыннан жасалған бұйымдар, инсталляциялар, көркем кескіндеме және графика туындылары да бар. Яғни, сурет өнері мен қолөнердің көрінісі қатар өрнектелді. Бұл 35 жыл бойы шығармашылық жолында қажырлы еңбек еткен, өнерді сүйетін суретші дарынының жемісі десек болады. Аман Мұқажанның өнеріне қанық, туындыларымен таныс әрбір адам суретші, қолөнершінің талғамы мен пайымына ерекше баға берері хақ.
Невзоровтар отбасы атындағы Шығыс Қазақстан облыстық бейнелеу өнері музейінің директоры Татьяна Стромская да өнерді ерекше бағалап, жылы лебізін білдірді.
— Көшпенді халықтың шеберлері ғасырлар бойы табиғи материал күмісті жоғары тұғырға шығарған. Шебердің қолынан шыққан бұйымдар сиқырлы сырға толы. Түсіне білген адамға туындыларынан қуану, мұңаю аңғарылып, құпия жасырылғаны байқалады,- деді Т.Стромская.
Шығыстану институтының бас ғылыми қызметкері Ш.Тоқтабаева: «Аман Мұқажанның шығармашылығы – ғажайыптар әлемі. Өйткені ол бүкіл әлем сияқты жан-жақты, терең, кең көлемді. Оның өнерін сүйетіндер және қалаушылар ұзақ уақыт бойы таң қалуға, зерделеуге, қуануға дайын. Сонда да олар Аман Мұқажанның бұйымдарында жасырылған құпия белгілер мен таңбалардың сырына жете бермейді»,- деп пікір білдірді.
Көрмеге жиналғандар жерлесіміз Аман Мұқажан елі мен жерін өзінің дарынымен, еңбекқорлығымен, қарапайымдылығымен, жоғары мәдениеттілігімен танытып жүргендігін ерекше атап өтті.
Бір сөзбен айтсақ, ғажайыптар мен сырға толы көрме өнерсүйер қауымның көңілінен шықты.
Лаура ГАКАЕВА, Невзоровтар отбасы атындағы Шығыс Қазақстан облыстық бейнелеу өнері музейінің қызметкері.
