Өткен жұма күні кешкісін семейліктер уақытын аялдамада қоғамдық көлік күтумен өткізді. Қоғамдық көліктердің басым бөлігі себепсіз желіден шығып кеткен. Тасымалдаушылар өздерінің әрекеттерін сапасыз жолдардың әсерінен көліктердің сынуымен байланыстырды. Әлбетте, бұл әлеуметтік желіде қызу талқыға түсті, қала тұрғындарының наразылығын тудырды. Тұрғындардың бірі тасымалдаушылардың әрекеттерін сынға алса, кейбірі жағдайдың жол ақысын көтеру үшін қолдан ұйымдастырылған акция екенін айтып жатты.
Ал сенбі күні қалалық прокуратурада жабық есік жағдайдағы жиын өткізілді. Бірақ оған бір күн бұрын желіге шықпаған үш тасымалдаушы мекемелерден ешкім келіп қатыспаған. Бұл ретте Семей қаласы әкімінің баспасөз қызметі төмендегідей ақпарат таратты:
«Ағымдағы жылдың 26 наурызы күні ШҚО әкімінің бірінші орынбасары Н.Сақтағановтың, облыс әкімінің орынбасары С.Ақтановтың және Семей қаласының әкімі Е.Сәлімовтің төрағалығымен қаланың тасымалдаушылары қатысқан жиын өтті.
Жиынның күн тәртібінде Семей қаласындағы жолаушылар мен жүк тасымалы, атап айтқанда, автобустардың жұмыс кестесінің сақталуы, жолаушылар легі, қоғамдық көліктердегі жол ақысы құны мен қала көшелерінің жағдайы сынды ағымдағы мәселелер қаралды.
Семей қаласының әкімі Ермак Сәлімов жиынға қатысушыларды ағымдағы жылға жоспарланып отырған жұмыс барысы жайында ақпараттандырды. Қала жолдарын жақсарту мақсатында 2017 жылғы ағымдағы жөндеу жұмыстарын (шұңқыр жөндеу) жүргізу үшін 200,0 млн. теңге көлемінде қаражат бөлінген. Аталған қаражат 2016 жылмен салыстырғанда 100 млн. теңгеге артық.
Орташа жөндеу жұмыстарын жүргізуге ағымдағы жылы 949,262 млн. теңге көлемінде қаражат бөлу жоспарлануда. Айта кетуіміз керек, 2016 жылы қала жолдарына орташа жөндеу жұмыстары жүргізілмеген.
Орташа жөндеу жұмыстарын жүргізетін 8 көше анықталды. Олар:
— Шәкәрім даңғылы, Абай көшесінен Қабанбай батыр көшесіне дейін;
— Б.Момышұлы көшесі, Шайжүнісов көшесінен Қабанбай батыр көшесіне дейін;
— Интернационал көшесі, Шмидт көшесінен Чайковский көшесіне дейін;
— Абай көшесі, Аймауытов көшесінен Жұмабаев көшесіне дейін;
— Шайжүнісов көшесі, Интернационал көшесінен Шәкәрім даңғылына дейін;
— Жұмабаев көшесі, Абай көшесінен Найманбаев көшесіне дейін;
— Дулатов көшесі, Жұмабаев көшесінен «Жансая» базарына дейін;
— Шмидт көшесі, Интернационал көшесінен Шәкәрім даңғылына дейін.
Бүгінгі күні, жоғарыда аталған іс-шаралар жоспарына сай, мемлекеттік сатып алулар заңы негізінде жұмыстарды атқару үшін байқау жарияланды. Сондай-ақ 2017 жылы Дальняя көшесіндегі тротуар мен жүргіншілер жолына күрделі жөндеу жұмыстарын жалғастыру үшін 104,903 млн. теңге көлемінде қаражат бөлінді.
Бүгінгі күні Семей қаласының жолаушылар көлігі және автомобиль жолдары бөлімімен қаланың орталық көшелері мен магистральды жолдардағы ойылған шұңқыр жолдарды жамау жұмыстары жүргізілуде. Аталған жұмыстар ауа райының қолайсыздығы себепті және асфальт бетонды төсеу мүмкін болмағандықтан жүргізіледі және ағымдағы жөндеу жұмыстары басталғанға дейінгі уақытша жөндеу болып табылады.
Келесі қаралған мәселе жол ақысының мөлшеріне байланысты болды. 2016 жылдың соңында қаладағы тасымалдаушылар тарифті көтеру туралы жергілікті билікке өтініш айтқан болатын. Бірақ тасымалдаушылардың тілегі қабыл болған жоқ. Десе де, соған қарамастан, 24 наурыз күні кешкілік бірқатар бағыттағы автобустар жолаушы тасымалдауға шықпады.
Жолаушы тасымалдаушылардың өкілдері бұл жағдайға байланысты облыс және қала басшылығына түсінік беріп, сол күні сағат 18.00-ден бастап бірқатар автобустар техникалық жағдайларға байланысты тоқтатылғандығын және келесі күні таңнан бастап толықтай барлық қоғамдық көліктер бағыттары бойынша жолаушы тасымалына кіріскенін айтты.
Жолаушы тасымалдаушылар бұл жағдай жол ақысын көтерумен немесе, бірқатар ақпараттық интернет порталдарында жарияланғандай, жолаушы тасымалдаушылардың акциясымен байланысты емес деген ақпарат берді.
Жолаушылар тасымалына байланысты жол ақысының тарифін көтеру мәселесі 2014 жылдан бастап айтылып келеді. Қалалық әкімдікте бұл мәселені жан-жақты қарастыру үшін арнайы комиссия құрылған. Ол комиссияның құрамында жолаушы тасымалдаушылар да бар. Қала әкімінің тапсырмасына сәйкес 2017 жылдың 14 ақпанында құрылған жұмыс тобы бүгінгі таңда өз жұмысын аяқтауға жақын»,- делінген.
Осы ретте айта кетсек, 2015 жылы жергілікті атқарушы билік тасымалдаушылардан жол ақысын көтеруге дәлелдер келтіруді сұраған болатын. Алайда бұл әлі күнге дейін жүргізілмей отыр. Қалалық прокуратурада өткен кездесуде қала әкімінің орынбасары Николай Ушаков бүгінгі күні қаладағы алты тасымалдаушының төртеуі өз есептерін толықтай көрсеткенін айтқан. Ал қалғандары тиісті құжаттарын 29 наурызда ұсынбақ, осыдан кейін барып жол ақысын көтеру мәселесі қалалық мәслихатта қарастырылмақ.
Жол ақысының өсуіне байланысты жолаушылар тасымалының сапасы жақсара ма, жоқ па, ол жағы белгісіз.
— Ақпан айындағы соңғы отырысымызда біз тариф бағасының 75 теңгеге дейін көтерілетінін айтқанбыз. Ол жолы тасымалдаушылар комиссияға құжаттарын бере алмады немесе бергісі келмеді. Мұның барлығы қалалық комиссияның жұмыс барысын едәуір кешеуілдетті. Меніңше, екі тарап та кінәлі. Әкімдік те, тасымалдаушылар да тариф бағасының қымбаттамайтынын айтқан. Тасымалдаушылар құқықтық тұрғыда дұрыс әрекет жасап отырған жоқ. Азаматтардың құқығына нұқсан келтіруге болмайды. Кеше олар өз міндеттерін орындаған жоқ, 90 пайызы автобус шығармады. Бұл — барып тұрған заңсыздық, сорақы әрекет,- деген еді қалалық прокуратурада жабық есік жағдайында өткен жиында Марат Турубаев.
Асан МЫРЗАХАН, «Семей таңы»
