Семейде күннің күрт жылынуынан қар еріп, тұрғындарды әбігерге салуда. Шаһардың шеткері аудандарындағы көшелер мен жекелеген үйлердің аулаларын су басып, автокөлік қозғалысына да қиындық келтіруде. Еріген қар суы Суық бастау кенті тұрғындарына да өз кедергісін келтіруде. Аталмыш аудандағы Цветочный көшесімен жүру қазір тіптен мүкін болмай отыр. Негізгі көшелердің бірі саналатын аумаққа жайылған судан адам түгілі көліктің өзі жүре алмайтын жағдайға жеткен. Ал тұрғындар болса балаларын қалай сабаққа жіберерлерін білмей дал.
Өткен жұмада, тұрғындардың жанайқайынан кейін, Суық бастау кентіне ат басын бұрдық. Тілшілер қауымын күтіп алған тұрғынның бірі түсіру тобын суға толы аталмыш Цветочный көшесімен бастап барды. Діттеген жерімізге жартылай жаяу, жартылай көлікпен жүріп, әрең дегенде жеттік. Халықпен кездесетінімізді естіген жергілікті атқарушы билік өкілдері де сол жерден табылды. Тұрғындар да бірден жылдар бойы қордаланып қалған көкейкесті мәселелерін жеткізді. Айтуларынша, кенттегі басты мәселенің бірі көктем сайын келетін еріген қар суы болып отыр. Соның салдарынан қатынас қиындап, оқушылар сабақтарынан да қалуға мәжбүр.
«Аялдамаға баратын осы жалғыз жол. Қыс бойы қар күрейтін көлік шақырғанымызбен, біреуі де келген жоқ. Келгендерімен, мынандай ауыр қарды күрей алмаймыз деп кетіп қалды. Қалың қар еріп көлге айналды. Ал енді демалыс аяқталды, балаларымыз сабаққа қайтіп барады? Жылда осы жағдай қайталанады. Биыл ағын су да көп болып тұр»,- дейді тұрғындар.
Аудандағы көкейкесті мәселе жалғыз бұл емес болып шықты. Суық бастауда қоғамдық көліктен бастап электр жарығы, шашылған күл-қоқыс пен жолдың азабы тұрғындардың әбден жүйкесін жұқартқан.
— Жаңағы Цветочный көшесінің өзі қисық-қисық. Соны түзеп, тегістеп ретке келтіру керек. Балаларымыз №48 мектепте оқиды. Олар малтып бара ма? Сабақ болса басталды. Жедел жәрдем мүлдем келе алмайды. Ауырған адамдарды жедел жәрдем көлігіне дейін өзіміз апарамыз,- дейді Дүйсен Макишев.
Тұрғындар өткен жылғы сайлау қарсаңында облыстық және қалалық мәслихат депутаттығына үміткерлер келіп, уәдені үйіп-төккендерін, ал кейін олардың қараларын да көрмегендерін айтып отыр. Көше жарығы мен жол мәселесі жергілікті атқарушы билік алдында да талай мәрте көтеріліпті.
— Алдыңғы жылы қала әкімі келгенде, мектепке дейін жарық орнатып, асфальт төселмесе де жолдың сілемін жасап берсе деп айтқан болатынбыз. Бұл жерде қаншама халық тұрады. Дегенмен жолымыз содан бері жасалған жоқ,- дейді Айтбай Қабдікеш есімді тұрғын.
Осы орайда Семей қаласы әкімінің баспасөз хатшысы Нұржан Есенжолов та пікір білдіріп, мәселені шешудің бірнеше жолын көрсетті.
— Алдымен шлак жеткізу жұмыстарын жүргізетін боламыз. Қазір өтініштер қабылданды. Екіншіден, су сорғыш көліктердің қажеттігін қараймыз. Қажет болмаған жағдайда, суды басқа жаққа бұру жолын жүргіземіз. Шыны керек, тұрғындарда да жауапкершілік болуы қажет. Қыс бойы халық өздері бірігіп маңайларындағы қарды шығару керек болған,- дейді әкімнің баспасөз хатшысы.
Сол күні Суық бастау кентіне баратын жолдағы көпірдің үстінен еріген қар суы жүріп кетіп, көлік қатынасы тоқтатылған болатын. Құртоған өзені деңгейінің көтерілуі салдарынан, көпірдің сол жағындағы жаяу жүргіншілер жүретін бөлігін су шайып кеткен. Қазір ол жер қалпына келтірілуде. Өзен деңгейі де төмендеп, қатынас кешкісін қайта жанданған.
Асан МЫРЗАХАН, «Семей таңы»
