Семей қаласындағы «Нұр Отан» партиясының филиалында «Зейнетақы жүйесін жаңғырту» тақырыбында семинар өткізілді. Еліміздегі зейнетақы жүйесін одан әрі жетілдіру мәселелері түсіндіріліп, талқыланған басқосуды Семей қаласының іскер әйелдер қауымдастығы мен «Даму» АҚ облыстық филиалы бірлесе ұйымдастырған.
Келелі басқосуға Іскер әйелдер ассоциациясының мүшелері, Семей қаласының әлеуметтік төлемдерді ведомствоаралық есептеу орталығы, қалалық жұмыспен қамту және әлеуметтік бағдарламалар бөлімі, «Бірыңғай жинақтаушы зейнетақы қоры» АҚ Семей қаласындағы өңірлік филиалы, мемлекеттік кірістер басқармасының өкілдері, мемлекеттік еңбек инспекциясы, кәсіпкерлер мен үкіметтік емес ұйымдардың өкілдері қатысты.
Кездесуде сөз алған Семей қаласының әлеуметтік төлемдер ведомстваралық есептеу орталығының жетекшісі Ляйла Сабырова, жұмыспен қамту және әлеуметтік бағдарламалар бөлімі басшысының орынбасары Болат Мусин, «Бірыңғай жинақтаушы зейнетақы қоры» АҚ Семей қаласындағы өңірлік филиалының директоры Дариға Дайрова зейнетақы жүйесінде орын алып отырған жаңашылдықтар мен өзгерістер туралы хабардар етті. Сонымен қатар зейнетақы жүйесін жетілдіру шаралары туралы баяндалды және қатысушылардың сауалдарына жауаптар берілді.
Айта кетуіміз керек, базалық зейнетақы тағайындау әдістемесінің өзгеруіне байланысты, базалық зейнетақы 2018 жылдың 1 шілдесінен өсетін болады. Жаңа әдістерге сәйкес, зейнетақы 1998 жылға дейінгі еңбек өтілі кіретін зейнетақы жүйесіне қатысу өтілі мен 1998 жылдан кейінгі жинақтаушы зейнетақы жүйесіне зейнетақы салымдарының түсу кезеңіне байланысты белгіленбек. Сонымен қатар, бірінші кезеңде, 2017 жылдың 1 шілдесінен бастап жыл басындағы 9 пайыздық өсімді есепке алғанда ынтымақты зейнетақы көлемі 11 пайызға, базалық зейнетақы көлемі жыл басындағы 7 пайыздық өсімді есепке алғанда 13 пайызға артатын болады. Нәтижесінде 2017 жылдың 1 шілдесінде зейнетақы көлемі 2016 жылғы зейнетақы көлемімен салыстырғанда 20 пайызға артпақ.
Семинар қорытындысы бойынша барлық қатысушылардың ұсыныстары хаттамаға жазылып, еліміздің Еңбек және халықты әлеуметтік қорғау министрлігінің және Халықты әлеуметтік қорғау орталығының назарына ұсынылады.
Асан МЫРЗАХАН, «Семей таңы»
