7 сәуір күні қалалық әкімдікте жол ақысына және тасымалдаушылардың қызмет сапасын жақсартуға байланысты кезекті жиын өтті. Жиынға қала әкімі Ермак Сәлімов, прокурор Марат Турубаев және қалаішілік тасымалдаушы мекемелердің өкілдері қатысты.
Жиында тариф бағасының көтерілуі және тасымалдаушылардың қызмет сапасының деңгейі мәселелері күн тәртібіне қойылды. Қала әкімі жол ақысының көтерілуі және қоғамдық көліктердің талапқа сай болуы бір-бірімен тығыз байланысты екенін, бұл мәселелер тасымалдаушылардан жоғары қызмет сапасын талап ететінін ескертті.
— Тасымалдаушылардың өтінішіне байланысты барлық шығындарды қарастырып, қоғамдық келісім кеңесімен ақылдастық. Сәуір айында тариф бағасына байланысты сұрақтар шешіліп, белгілі бір келісімге келеміз деп ойлаймын. Біз белгілеген жол ақысы – 80 теңге. Бұл, әрине, бірінші кезекте тасымалдаушылардан жауапкершілікті талап етеді. Тасымалдаушылармен жүйелі түрде құрылған, заңды күші бар келісімшартпен жұмыс істейміз. Келісімшартта көрсетілген жағдайлар орындалмаған немесе бұзылған жағдайда, екі тарапқа да айыппұл белгіленген. Біз де қол қусырып қарап отырған жоқпыз, жол жөндеу жұмыстарына кірістік. Интернационал және Шәкәрім даңғылы көшелерінде орташа жол жөндеу жұмыстары басталды. Техникалық консультант жұмыс істеп жатыр. Тариф бағасының көтерілуі өз уақытымен болады. Сіздер қоғамдық көліктердің өз деңгейінде жүріп-тұруын қадағалап, соған кепілдік беріңіздер,- деді Ермак Сәлімов тасымалдаушыларға.
Осыдан соң прокурор Марат Турубаев «Семавтопарк» ЖШС басшысы Владимир Филичкинге: «Қаладағы қоғамдық көліктердің көпшілігіне иелік ететіндіктен, сіз, қоғамдық көліктер сынып немесе бұзылып қалды деген уәж айтпай, олардың уақтылы жүріп-тұруына жүз пайыз кепілдік бере аласыз ба?»- деген сауал тастады. Өз кезегінде Владимир Филичкин барлық жағдай оның қолында емес екендігін, төтенше жағдайлар кез келген уақытта орын алатынын және көліктердің аяқ астынан сынып немесе бұзылып қалуы әбден мүмкін екенін, бірақ қолынан келгенін жасайтынын жеткізді.
— Біз онда келісімшартты не үшін жасадық? Белгіленген уақытта жүріп-тұруға кепілдік бере алмасаңыз, мойныңызға жауапкершілік алмауыңыз керек еді. Сіздің қолыңызда емес жағдайлар – су тасқыны, жер сілкінісі, соғыс немесе өрттің орын алуы. Бұл форс-мажорлық жағдайлар келісімшартта да көрсетілген. Басқа жағдайлардың бәрінде жол тауып шығуға болады. Автобус бұзылып немесе сынып қалған жағдайда, қосымша автобустар дайын тұруы керек,- деген прокурорға Владимир Филичкин келісімшарт бойынша екі жақ та өз міндетін мүлтіксіз орындауы тиіс екендігін айтты.
— Мен жолаушыларды тасымалдауға жауап беретін болсам, келісімшарт бойынша, екінші тарап жол қауіпсіздігіне жауап беруі тиіс. Егер жүргізуші шұңқырға түсіп кетсе, бұл да форс-мажорлық жағдай емес. Мен бұл салада бірінші жыл жүрген жоқпын. Осыған дейін біздің тараптан ережені бұзған немесе жолаушылар өміріне қауіп төндірген жағдайлар орын алған жоқ. Егер жол түп-түзу болса, елу теңгеге де жолаушыларды тасымалдауға дайынбыз,- деп сөзін қорытты ол.
Бұл жиында да жол ақысына байланысты мәселе өз шешімін тапқан жоқ. Дегенмен әкімдік тарапынан тасымалдаушылардың сұранымына байланысты жол ақысын сексен теңгеге көтеру мәселесі айтылды.
Жадыра ТӨЛЕГЕНҚЫЗЫ,
«Семей таңы»
