Семейде электр энергиясы тағы да қымбаттауы мүмкін. Ағымдағы жылдың мамыр айынан бастап жарық құны 3,9 пайызға көтеріледі деп күтілуде. Бұл жайында электр энергиясын сату тарифтеріне арналған қоғамдық тыңдауда мәлім болды.
Энергетиктер өткізген қоғамдық тыңдауға «Шығысэнерготрейд» ЖШС директорының орынбасары Мстислав Мартемьянов, үкіметтік емес ұйымдар өкілдері, қоғам белсенділері және БАҚ өкілдері қатысты. «Шығысэнерготрейд» мекемесі өкілдерінің айтуынша, ҚР Ұлттық экономика министрлігі Табиғи монополияларды реттеу және бәсекелестікті қорғау комитенінің Шығыс Қазақстан облысы бойынша департаментіне 1 мамырдан бастап жарық тарифін жоғарылатуға өтінім берген. Осылайша, энергетиктер жыл басында ғана көтерілген жарықтың құнын тағы да 3,9 пайызға көтеруді сұрап отыр.
Жиында сөз алған «Шығысэнерготрейд» ЖШС директорының орынбасары Мстислав Мартемьянов жарық құнының өсуіне серіктестіктің банк алдындағы қарызы мен басқа да шығындары себеп болып отырғанын айтады.
— Тарифті көтеруге шығындарымыз себеп болып отыр. Есептерді жеткізу, тұтынушыларға қызмет көрсету, абонент бөлімі, операторлар жұмысы, сонымен қатар компьютер техникаларын сатып алуымыз керек. Оның сыртында несиеміз бар. Бүгінгі күні біздің қарызымыз 2 млрд. 200 млн. теңгені құрайды. Банк несиесінсіз біз бұл қарызды жаба алмаймыз, сондықтан несие алмасқа шарамыз жоқ,- дейді «Шығысэнерготрейд» ЖШС директорының орынбасары Мстислав Мартемьянов.
Ал қоғамдық тыңдауға қатысқан семейліктер тарифті көтеру негізсіз екенін айтып, қарызды тұтынушылар есебінен қайтару дұрыс еместігін атап өтті. Ал пайдаланылған жарық үшін түбіртекті басып шығарып, жеткізу расымен шығын екенін, оны электрондық түрде жеткізуді қолға алу керектігін айтты.
Жиын соңында ҚР Ұлттық экономика министрлігі Табиғи монополияларды реттеу және бәсекелестікті қорғау комитетінің Шығыс Қазақстан облысы бойынша департаментінің өкілі Наталья Петрова тариф құнын өсірмеуді немесе ағымдағы жылдың 1 шілде айына дейін тоқтата тұру керектігін атап өтті.
Асан МЫРЗАХАН, «Семей таңы»
