Мемлекет басшысы Н.Ә.Назарбаев Ұлт жоспары — «100 нақты қадамның» 84-қадамында әлеуметтік көмекті оның атаулы сипатын күшейте отырып оңтайландыруды тапсырған. «Әлеуметтік көмек тек оған шынымен зәру азаматтарға ғана берілетін болады. Кірісі төмен еңбекке қабілетті азаматтарға мемлекеттік атаулы әлеуметтік көмек тек олардың еңбекке ықпал ету және әлеуметтік бейімдеу бағдарламаларына белсенді қатысуы жағдайында ғана берілетін болады»,- деп атап өткен болатын Елбасы.
Елбасы тапсырмасын жүзеге асыру мақсатында 2018 жылдың 1 қаңтарынан бастап жаңа форматтағы адрестік әлеуметтік көмек түрі енгізілмек.
— Жаңа форматтағы адрестік әлеуметтік көмек қазіргі қолданыстағы — 18 жасқа дейінгі балалардың жәрдемақысы және 4 және одан көп баласы бар көпбалалы отбасылар алатын жәрдемақы мен әлеуметтік жәрдемақы – осы үш түрлі төлемдерді өзгерту есебінен енгізілетін болады,- дейді жұмыспен қамту және әлеуметтік бағдарламалар бөлімі басшысының орынбасары Айдар Самаев.
Жаңа адрестік әлеуметтік көмек бойынша, жәрдемақы көмекке шынымен зәру адамдарға ғана берілмек. Осы мақсатта адрестік көмек шартты және шартсыз ақшалай жәрдем деген екі түрге бөлінетін болады. Шартсыз ақшалай көмек құрамында еңбекке қабілетті мүшесі жоқ (мысалы, мүгедектер отбасы, қарт зейнеткерлер) отбасыларға және мүшелері нақты себептермен жұмысқа тарту шараларына қатыса алмайтын отбасыларға (мысалы, мектеп жасына дейінгі бала тәрбиелеп отырған жалғызілікті ана) беріледі. Жәрдемақы алу үшін мұндай отбасылардан міндетті жұмысқа тарту шараларына қатысу талап етілмейді.
Шартты ақшалай жәрдем бойынша жұ-мысқа қабілетті жандар жәрдемақыларын алу үшін әлеуметтік келісімшарт жасасып, жұмыс табуға міндеттеледі. Жұмыс табуға жұмыспен қамту және әлеуметтік бағдарламалар бөлімі көмектеседі. Олар кәсіптік даярлық арқылы немесе жастар тәжірибесі бағдарламасы және өзге де бағдарламалар арқылы қайта оқытып, жұмысқа орналастыру жағын қарастырады.
Жаңа әлеуметтік көмекті енгізу арқылы халықтың әл-ауқатын арттыру көзделіп отыр. Сонымен бірге, қазіргі күні жәрдемақы мөлшері 9 мың теңгеден астам болса, адрестік әлеуметтік көмек енгізілгенде, ол қаржы еселене түспек.
Жұмыспен қамту және әлеуметтік бағдарламалар бөлімі мамандарынан құралған бірнеше мобильді топ 2018 жылы қолданысқа енетін өзгерістерді жәрдемақы алушы әрбір отбасының үйіне барып түсіндіріп жүр. Сәрсенбі күні де мобильді топ кезекті рет тұрғындарға түсіндіру жұмыстарын жүргізуге кірісті.
— Семей қаласы бойынша мұндай әлеуметтік көмектерді алушы 1500-ден астам отбасы бар. Бүгін кезекті рет түсіндіру жұмыстарын жүргізу үшін тұрғындардың үйін аралауға шықтық. Біздің топ орташа есеппен күніне 60 үйді аралайды. Дерекқордағы мекенжай бойынша тұрғындарға барып, әлеуметтік көмек алу жөніндегі ақпараттардан құлағдар етіп, түсіндіру жаднамаларын таратамыз,- дейді жұмыспен қамту және әлеуметтік бағдарламалар бөлімінің бас маманы Әмина Мусинова.
Мамандардың айтуларынша, жаңадан енгізілетін өзгерістер көмек алушылар үшін тиімді. Оны енгізудегі мақсат халықтың әл-ауқатын арттырып, төменгі күнкөріс деңгейін мейлінше жоғарылату екендігін ескерген жөн.
Әйгерім СӘРСЕНҒАЛИ,
«Семей таңы»
