Семей қалалық мәслихатының хатшысы Бейсенбек Ақжалов бастаған бір топ халық қалаулылары сейсенбі күні қаладағы қоғамдық көліктердің жұмысына терең үңілді. Мәслихаттың өндірістік комиссиясының мүшелері жолаушылары көп қала аялдамаларының біріне барып, көлік жүргізушілермен және жолаушылармен тілдесіп, автобустардың санитарлық талапқа қаншалықты лайықты екендіктеріне көз жеткізді.
Қала көшелеріндегі қоғамдық көліктер қатынасы тұрғындар көңілін көншітпейді. Тазалығы тағы бар. Бұл биыл ғана айтылып, болмаса жазылып келе жатқан жайт емес. Жылдағы көрініс, келеңсіз жағдай. Өкінішке орай, «баяғы жартас — сол жартас» күйінде қалып отыр. Бұл жолы да, әдеттегідей, автобустардың уақытынан кешігуі, салон ішінің «кіршеңдігі» еш өзгеріссіз екен.
— Біз бұл мәселеден хабардармыз. Өткен жылы да дәл осы уақытта қоғамдық көліктердің жұмыс сапасы мен жолаушыларға қызмет көрсету аясын тексеріп, көрген кемшіліктерімізді тасымалдаушы мекеме басшыларына айтқан болатынбыз. Айтылған сыннан қорытынды шығарғандары өз кемшіліктерін дер кезінде түзетті. Алайда бұл бір мезеттік жұмыс емес, сондықтан биыл да, жылдағы дәстүр бойынша, кезекті мәрте бақылауға шығып отырмыз. Нәтижесі көз алдымызда. Бұдан бөлек жолаушылар уәжіне де құлақ түрмекпіз. Олардың тарапынан айтылар сын мен ұсыныстар да ескерусіз қалмайды,- дейді қалалық мәслихат хатшысы Бейсенбек Ақжалов.
Алдымен Суықбастау кенті мен темір жол вокзалы арасына қатынайтын №13 автобусқа мінген депутаттар көлік жүргізушісімен тілдесіп, кестеге сай жүрер–жүрмесін сұрады. Бұдан бөлек салон ішіндегі ескірген хабарландырулар мен кір басқан орындықтардың ауыстырылмайтындығына сын айтты.
Алайда бұл жауаптың шындыққа жанаспайтындығын ашына айтқан жолаушылар сол көліктің өз ішінен табылды. Өзін Айнаш Ерғалиқызы деп таныстырған жерлесіміз осы және № 9 бағыттағы автобустың өз міндеттеріне салғырт қарайтынын атап өтті. «Бұл автобустардың түс мезгілінде соңғы аялдамаларда сағаттап тұрып алатындары жанға батады. Себебін сұрасақ, таусылмайтын сылтаулар. Біресе көлік сынып қалады, біресе келесі автобусты күтуіміз керек екен. Соның салдарынан жұмысқа кешігеміз. Сенбі, жексенбі күндері автобустардың қатынауы тіптен нашар»,- дейді қала тұрғыны.
Әпкеміздің сөзін қуаттағандарға депутаттар №45 автобусқа бас сұққан сәтте куә болды. Өйткені Шығыс кенті мен Северный кентінің арасын жалғайтын бұл автобусты сарыла күтуге осы аумақ тұрғындарының еті үйреніп кеткен. Мәселен, бүгін осы бағыттағы 3 автобустың екеуі ғана желіде, ал соңғысы не себепті жолға шықпағаны белгісіз. Дәл осындай келеңсіздіктер №№14, 22, 32 бағыттағы қоғамдық көліктерде де орын алды.
— Мен ауысымдық жұмыста еңбек етемін. Кешкі сағат 8-де жұмыстан шығып аялдамаға келсең, автобус көрмейсің. Еріксіз үйге таксимен жетеміз,- деді тағы бір жерлесіміз Жанат Сүлейменова.
Қоғам болғасын пікірлер де әрқилы. Біреу ренішті болса, енді бірі бейтарап ұстанымда. Зейнеткерлер жағы, өзге қалалардағы сияқты, қоғамдық көлікте тегін жүру құқын қайтарып беруді қалайды. Осы ойларды бір арнаға тоғыстырған өкілетті билік ортақ шешім шығаруды алдағы күннің еншісіне қалдырды.
— Біздің негізгі мақсатымыз — жолаушылар көзқарасымен санасу. Айтылған жайттар мен көтерілген мәселелер алдағы кезекті сессияда қарастырылатын негізгі сұраққа айналмақ. Оған дейін біз жолаушылар тасымалымен айналысатын мекеме басшыларымен жүздесіп, бүгінгі сапарымызда көрген – білгенімізді ортаға саламыз. Бүгін біз «Семей көлігі», «Таксопарк», «Семавтопарк» сынды мекемелерге қарасты автобустардың жұмысымен таныстық. Менің ойымша, жолаушылар тасымалын өз мойындарына алған мекемелер, облыс әкімі Даниал Ахметов атап өткендей, билікке түрлі сылтаулы шарт қоя бергенше, өз жауапкершіліктерін толықтай атқарса деймін,- деді қалалық мәслихаттың өндірістік комиссия төрағасы Әміржан Ахметжанов.
Ермек ИСАБАЕВ, «Семей таңы»
