Семейде қоғамдық көлік қатынасын оңтайландыру және жолаушылар тасымалы сапасын арттыру мақсатында ғылыми зерттеу жүргізіледі. Семей қаласы әкімдігінде өткен жиында қала басшысы Ермак Сәлімов осы жұмыстарды мойнына алған мердігер мекемемен таныстырды. Қаламыздағы жолаушылар тасымалымен айналысатын мекеме өкілдері алдында «Көлік және коммуникация ғылыми –зерттеу институты» ЖШС директорының орынбасары Байболат Баймаханбет атқарылатын шаруалар жайында кеңінен мағлұмат берді.
Алматы қаласында орналасқан ғылыми–зерттеу институты бұл іспен бірінші рет айналысып отырған жоқ. Өз тарихтарында көптеген жауапты жұмыстарды абыроймен атқарған мекеме бізге дейін Алматы, Ақтөбе, Тараз, Қарағанды, Павлодар, Шымкент қалаларында еңбек еткен. Байболат Досалыұлының сөзіне қарағанда, қоғамдық көлік мәселесі қазір еліміздің көптеген қалаларында орын алған. Нәтижесінде кемшіліктер жетіп артылатыны анықталған. Олардың қатарында алдыңғы кезекке білікті кадрлардың жетіспеушілігі шығып отыр екен. Соның кесірінен бұл салада нағыз мамандар тапшы. Сонымен қатар тариф мәселесі де өткір тұр. Жергілікті бюджеттен бұл саланың субсидиялануы да көңіл көншітпейді. Ал Семей қаласы үшін басты мәселе – жолаушыларға сапасыз қызмет көрсету.
— Біз өз жұмысымызда жалпы қолданыстағы жолаушылар тасымалының қазіргі инфрақұрылымын тексеруден бас-таймыз. Бұл дегеніміз – жол желісі, қоғамдық көлік қатынайтын жолдың кеңдігі, аялдамалардың қазіргі жай–күйі, соңғы аялдамадағы автобустардың айналма алаңының жағдайы. Тәулігіне 12-14 сағат көлік тізгінінде отыратын автобус жүргізушілеріне бұл жерлерде тамақтанатын орыннан бастап барлық жағдай жасалуы керек. Біз Семейдегі жолаушылар тасымалымен айналысатын 6 мекеменің өндірістік – техникалық базасын тексеруіміз керек. Бұл жерлерде ең бастысы – медициналық бекеттің болуы. Біз, әдетте, жүргізуші денсаулығына қажетті тексеруді таңертеңгі уақытта ғана жүргіземіз. Алайда кешке де тексеруді ұмытпағанымыз жөн. Мұнымен қоса техникалық бекет жұмысы да тексеріледі. Олар күн сайын, автобустар жолға шықпас бұрын, техникалық ақауы бар–жоғын, салон ішінің тазалығын, тиісті адамдар телефонының жазылғандығын бақылауы қажет. Ал белгіленген тәртіп бойынша, жүргізуші мен бақылаушы арнайы киім үлгісімен жұмысқа шығуы шарт. Біз осылардың барлығына назар аударатын боламыз. Бастысы –тексеру жұмыстары. Ол үшін арнайы есепшілер таңның атысы мен кештің батысы, яғни автобус тоқтағанға дейін отыратын болады,- дейді Байболат Баймаханбет.
Арнайы есепшілер үшін уақытша жұмыс орындары ашылады және оған ниет білдіргендерді жұмысқа қабылдау қалалық Жұмыспен қамту орталығы арқылы жүзеге аспақ.
— Біз уақытша жұмысқа 70–тей адамды қабылдауды жоспарлап отырмыз. Олардың 60–ы есепшілер болады. Олар сағатына 500 – 650 теңге аралығында жалақы алады. Жұмыс оңай емес, таңғы сағат 5 жарымнан кешкі 9-10 – ға дейінгі аралықты қамтиды. Сенбі, жексенбі, мереке күндері, қоғамдық көлікте қатынайтын жолаушылар санының аздығына байланысты, жұмыс істемейді. Тексеру жұмыстары 25 мамырға дейін жалғасады. Есептеу барысында жолаушылар саны мен жеңілдікке ие болғандар саны анықталады,- деді ғылыми–зерттеу институты директорының орынбасары.
Кездесу барысында Байболат Досалыұлы зерттеу жұмыстарына жолаушы тасымалдаушылардың белсенділік танытып, қолдау көрсетуін өтінді. Өйткені ол жолау-шылар тасымалы ережесіне қайшы келетін бірнеше айғақтарды атады.
Зерттеу жұмыстарының алғашқы қорытындыларын ағымдағы жылдың қазан айында жарияламақ. Зерттеу аяқталысымен, қаламыздағы қоғамдық көлік жұмысының жақсаруы үшін, қысқа әрі ұзақ мерзімді ұсыныстар беріледі. Жиын соңында қала әкімі Ермак Сәлімов бұл ортақ іс екендігін атай келе, жергілікті атқарушы билік тарапынан барлық көмектің берілетінін жеткізді.
Ермек ИСАБАЕВ,
«Семей таңы»
