Жоламан кенті тұрғындарының көптен күткен ауыз су мәселесі шешімін тапты. Осыған орай 20 маусым күні қала әкімі Ермак Сәлімов және қалалық мәслихат депутаты Мәрлен Көкірекбаев аталған кентке арнайы барып, тұрғындарымен жүздесіп қайтты.
Жоламан кентінің тұрғындары осыған дейін суды колонкадан тасып ішіп жүрген болатын. Ауыз су мәселесін жолға қою туралы тұрғындар өтінішіне құлақ түрген халық қалаулысы Мәрлен Көкірекбаев қалалық әкімдіктен көмек сұраған екен. Шаһар басшысы Ермак Сәлімов пен депутат Мәрлен Көкірекбаевтың араласуымен бүгінде аталған мәселе оң шешімін тауып, Жоламан кентіндегі үйлерге су құбыры тартылып жатыр.
Тұрғындардың сөзіне қарағанда, аталған кентте көп жылдар бойы ауыз су мәселесі шешілмей келген.
— Менің бала кезімнен бері бұл ауданда су мәселесі жолға қойылған емес. Осыған дейін тұрғындар айналдырған екі-үш колонкада кезекке тұрып, су тасып келді. Әсіресе қыс мезгілінде су тасу халыққа қиын болатын. Енді, міне, үйімізге су келіп, қуанып жатырмыз,- дейді зейнеткер Құсманжан Жұмабеков.
Жоламан кенті тұрғындарының кезекті өтініш-шағымын тыңдаған Ермак Бидахметұлы алдағы уақытта аталған ауданнан балалар ойнайтын алаң салу жоспары барын жеткізді.
— Біз, өкінішке орай, қаланың орталығын абаттандыруға көп көңіл бөліп, шет аймақтарды назардан тыс қалдырып жатамыз. Осы мәселелерді жолға қою үшін округ депутаттарымен жұмыс істеуді бастадық. Яғни қалалық мәслихат депутаттары өз округтерінің өзекті деген проблемаларын қалалық әкімдікке жеткізеді, ал біз тиісті мекемелер мен кәсіпкерлердің араласуымен қолдау көрсетуге тырысамыз. Бәсекелестікті арттырсақ, жұмыс жандана түседі деп ойлаймын. Өз ісіне жауапкершілікпен қарайтын белсенді депутаттардың бірі Мәрлен Көкірекбаев бүгін, міне, халықтың қуанышына себепкер болып отыр,- деді тұрғындармен жүздесу барысында қала әкімі Ермак Сәлімов.
Тұрғындардың жер, тұрғын үй мәселесі бойынша қойған сауалдарына жауап берген Ермак Сәлімов «Нұрлы жер» бағдарламасы арқылы жаңа үй салуға болатынын да айтып өтті.
— Мемлекет ешкімге тегін тұрғын үй бермейді, тек жеңілдіктер қарастырған. Біріншіден, «Тұрғын үй құрылыс жинақ банкі» АҚ арқылы, екіншіден, «Нұрлы жер» бағдарламасы арқылы баспанаға ие болуға болады. «Нұрлы жер» бағдарламасы арқылы баспана салуға қаламызда 10 жер учаскесі анықталған. Бұл 3 кезеңде жүзеге асады. Бірінші кезеңде Ақсай, Ұшақтар, Комсомол кенттері қарастырылған,- деді қала әкімі.
Жадыра ТӨЛЕГЕНҚЫЗЫ,
«Семей таңы»
