Шығыс Қазақстан облысының әкімі Даниал Ахметовтің тапсырмасымен өткен аптада облыс әкімінің орынбасары Нұрымбет Сақтағанов Алакөлге жұмыс сапарымен келіп, жағалауда арнайы жиын өткізді. «Алакөл — Тазалық» ЖШС-нің мекемесінде облыстық және аудандық бөлім, мекеме басшыларының қатысуымен өткен жиында Алакөл жағалауында атқарылып жатқан жұмыстар жан-жақты талқыланды.
Облыс әкімінің орынбасары Нұрымбет Сақтағанов Үржар ауданының әкімі Серік Зайнулдин бастаған әкімдіктің тарапынан атқарылып жатқан жұмыстарды жоғары бағалады. Сонымен қатар Нұрымбет Аманұлы Алакөлге келген демалушылардың денсаулығы басты назарда болуы қажеттігін және заман талабына сай туристік кластер қалыптастырудың маңызы жоғары екенін атап өтті. Үржар ауданы әкімінің орынбасары Жарқынбек Байсабыров туристік аймақта атқарылған жұмыстар жайлы баяндай келе, көл басындағы бірқатар мәселелерге де тоқталды.
— Бүгінде Алакөл аумағын абаттандыру, көгалдандыру, санитарлық тазалық, өрт қауіпсіздігі шаралары, құрылыс жұмыстарының уақыт талабына сай болуын қалыптастыру мақсатында облыстық комиссия мүшелері жеке кәсіпкерлермен түсіндіру жұмыстарын жүргізді. Нәтиже бойынша, туристік аумақта орын тепкен 147 нысанның 76-сы заң талаптарына сай келіп, демалыс маусымына дайын екені анықталды. 8 демалыс үйі межеленген мақсаттарды шілде айында аяқтауды жоспарлап отырса, қалған демалыс базалары да осы жуық күндері тамамдамақ. Бұдан өзге 26 нысан иелері заман талабымен бірге төңіректерін абаттандырып жатыр. Ал қалған 24 демалыс үйі аталған талаптарға сай емес деп танылды. Алакөл аумағын көркейту мақсатында облыстық бюджеттен 500 млн. теңге бөлініп, 7 жоба іске асты. Атап айтқанда, саябаққа 360 түп көшет отырғызылып, тамшылатып суару әдісін қолданудың нәтижесінде әр алуан талдар тамырланып, айнала жасыл желекке оранды. Сондай-ақ тақта тастар төселіп, қоршаулар орнатылып, жарықтандыру жүйелерінің жұмыстары аяқталды. Сонымен қатар орталық көшеде орын тепкен Арбат жобасының жоспарындағы аумаққа 5 мың шаршы метрге тақта тастар төселіп, шамдар орнатылды,- деген Жарқынбек Борашұлы бүгінгі күні туристік кешендегі мәселелердің бірі электр энергиясы екендігін айтып, осы ретте жоғары вольтті жүйелерді Мақаншы ауылынан тартуды жоспарлап отырғандарын айтты.
Нұрымбет Аманұлы заңсыз сауда жасау мәселесін де назардан тыс қалдырмады. Бұл ретте лицензиясы жоқ сауда жасаушыларға түсіндіру жұмыстарын жүргізіп, құлақ аспаған жағдайда, айыппұл салу қажеттігін атап өтті. Сонымен бірге, жергілікті полиция қызметкерлеріне қызметтік автокөліктердің жетіспеуіне байланысты, керекті мәліметтер тізімін беруді ЖПҚ-ның басшысы Болат Төлешке тапсырды. Бұл жиында Алакөл жағалауындағы құтқарушылардың да мәселесі айтылды.
Нұрсұлтан ЕСЕМБАЕВ, Үржар ауданы.
