Шығыс Қазақстан облысының әкімі Даниал Ахметов арнайы жұмыс сапарымен Зайсан ауданына барды. Облыс әкімі ауданға жасаған кезекті жұмыс сапары барысында аудан аумағындағы археологиялық қазба жұмыстармен танысып, бірқатар өндіріс ошақтарын, әлеуметтік нысандарды аралады.
Алдымен Даниал Ахметов Қаратал ауылдық округінің аумағындағы халық ішінде «Жеті оба» аталатын қорымдарды аралап көруден бастады. Айта кетсек, биыл бұл мекенде археологиялық қазба жұмыстары жүруде. Бұғанға дейін Зайсан ауданына қарасты киелі мекен Шіліктіде ауқымды зерттеу жұмыстарын жүргізген археолог – ғалым Әбдеш Төлебаев мұндағы қазба жұмыстарымен егжей – тегжейлі таныстырды. Осыдан кейін облыс әкімі Айнабұлақ ауылдық округіне қарасты Көрпе өзенінің аумағындағы тағы бір қорымдағы зерттеу жұмыстарына да қанықты. Ғалым Әбдеш Төлебаев осы жерде облыс әкіміне бұл күнде зерттеліп жатқан төрт оба туралы толықтай мағлұмат беріп, қазба жұмыстары кезінде табылған жәдігерлерді көрсетті. Жалпы, Зайсан ауданы тарихи мұраларға бай өңір екенін жақсы білеміз. Елбасының «Болашаққа бағдар: рухани жаңғыру» атты бағдарламалық мақаласы аясында, мұнда ауқымды археологиялық қазба жұмыстары жүріп жатыр. Өзінің жұмыс сапары барасында аймақ басшысы қазба жұмыстарында алғаш табылған Афанасьев мәдениеті жәдігерлерімен танысты. Көне артефакттардың ішінде салт — жоралғыларды жүргізуге арналған сауыттар, мыс пышақтары мен тас-тан жасалған еңбек құралдары бар. Әбдеш Төлеубаевтың айтуынша, нақ осы жерде біздің заманымызға дейінгі 25-18 ғасырда қолданыста болған 500-ден аса жекелей ескерткіштер табылыпты. «Афанасьев мәдениеті — қола дәуірінің алдында болған үлкен бір мыс, тас дәуірінің мәдениеті. Сондықтан бұл археология ғылымына, Қазақстан тарихына қосылған бір жаңа деректер деп есептеймін. Шығыс Қазақстан облысында зерттеліп жатқандай, археологиялық кешендерге мән беріп жатқан ешбір облыс жоқ», — дейді бұл ретте Әбдеш Төлеубаев. Аймақ басшысы Даниал Ахметов осындай қазба жұмыстарының маңыздылығына тоқталды. Бұл ретте облыс әкімі еліміздің тарихын әйгілейтін һәм айшықтайтын обалар мен қорымдарды көпшіліктің тамашалайтын орынға айналдыру керектігін айтып, бұл бағыттағы жұмыстарды әлі де ширата түсу қажеттігіне басымдық берді.
Даниал Ахметовтің Зайсан ауданындағы жұмыс сапары Қаратал ауылындағы биыл жөндеу көрген орта мектепті аралаумен жалғасын тапты. Әлбетте, еліміздің болашағы білімді ұрпақтың қолында екенін ескерсек, оларға барлық жағдай жасау бүгінгі күннің басты талабы. Иә, биыл білім беру бағытында жаңа бастама бар. Шығыс Қазақстан облысы алғаш болып орта оқу орындарын қолдауды мақсат тұтқан «Туған мектеп» бағдарламасын жүзеге асырмақшы. «Туған жер» жобасының жаңа бағытын облыс әкімі Даниал Ахметов аудандағы іссапары барысында қолға алуды тапсырды.
Қаратал орта мектебінің оқушылары биылғы оқу жылын аса қызығушылықпен күтті. Өйткені білім ошақтарында заманауи құралдармен жабдықталған география, тарих кабинеттері жасақталып, шеберханалар жаңартылды. Мектептің қазіргі кейпі — түлектердің еңбегі. Олар «Түлеп ұшқан білім ошағына көмектесу» борышымыз деп санайды. Облыс әкімі Даниал Ахметов, бұл тәжірибені өзге де аудандарда қолдану керек екенін атап өтті.
— Жуық арада үш кезеңнен тұратын бағдарламаны жасап, мектептерге керекті жабдықтар тізімін анықтау керек. Кейін мектеп түлектерімен хабарласып, патриоттық акцияға қатысуға шақыруға болады, — дейді осы орайда Даниал Кенжетайұлы.
Мектепті аралаған соң, аймақ басшысы ауылдық ауруханаға барды. Ем — шара бөлмелерімен танысып, облыс әкімі жетіспейтін медициналық құрал-жабдықтардың санын анықтау жағын ескертті. Бұл күнде «Нұрлы жер» мемлекеттік бағдарламасы аясында Кондюрина көшесінде 60 пәтерлі екі көпқабатты үйдің құрылысы жүріп жатыр. 2018 жылда аяқталуы тиіс жұмыстардың қарқыны мен сапасы өңір басшысының көңілінен шықты. Аудан әкімі Темірбек Қасымжанов көп қабатты қос тұрғын үйді межелеген уақытта халыққа пайдалануға беру үшін барлық мүмкіндіктер пайдаланылып жатқанын жеткізді. Бұл ретте облыс әкімі: «Жарайсыңдар. Ешқандай мәселе жоқ. Сіздер өзгелерге үлгі көрсетіп отырсыздар» деп қысқа қайырды. Зайсан ауданында инфрақұры-лымды дамытуға бағытталған «Нұрлы жол» бағдарламасы сәтті жүзеге асуда. Тұрғын үйлер мен әлеуметтік маңызы бар нысандарды қалалық коллекторға қосу үшін кәріз жүйесін салу жұмыстары жүргізілуде.
Облыс әкімі Даниал Ахметов, шағын тракторларды құрастыратын зауытта да болды. Бұл жерде көршілес Қытай елінен құрал-саймандар сатып алынып, ауыл шаруашылығына қажетті техника құрастырылады. Кейін облыс шаруаларына тиімді бағамен сатылады. Жуық арада коммуналды қызметке арналған көпфункционалды шағын тракторлар да шығару жоспарланып отыр екен.
Зайсан ауданында мемлекеттік-жекеменшік серіктестік те дамыған. 87 орынға шақталған «Happy Babу» балабақшасын кәсіпкер Қайсар Жұманов ашты. Кәсіпкер 53 млн. теңге жұмсап, нысанды күрделі жөндеуден өткізді. Бүгінде бүлдіршіндерді тәрбилеуге барша жағдай жасалған. Сапар соңында облыс әкімі «СМУ-Шығыс» ЖШС-не на қарасты темір-бетон зауытына да аялдады. Өзінің Зайсан ауданына жасаған арнайы іссапарында облыс әкімі әр салада атқарылып жатқан игі істерге оң баға беріп, ауданның болашағы зор екеніне сенім білдірді.
Нұргүл ХАЛЫҚОВА, «Семей таңы»
