Семей қаласының әкімдігінде кезекті рет «Алтын алқа» және «Күміс алқа» иегерлерін марапаттау салтанаты өтті. Бұл жолы да ақ жаулықты, алтын құрсақты аналарымызға төсбелгі мен куәліктерін Семей қаласы әкімі аппаратының жетекшісі Зәуреш Исабаева, қалалық жұмыспен қамту және әлеуметтік бағдарламалар бөлімінің басшысы Азамат Құрманғалиев табыстады.
Қазіргі таңда Қазақстанда «Алтын алқа» және «Күміс алқа» иегерлеріне жақсы қолдау көрсетіліп келеді. Семей қаласында кейінгі жылдары мұндай марапатқа ие болған жандардың саны артты. Осы мәртебеге бұған дейін жүздеген ананың қол жеткізгені белгілі. Бүгінде өмірге көп бала әкеліп, еліміздің демографиялық жағдайын жақсартуға мол үлесін қосып жатқан жандар аз емес. Мемлекет оларды назарында ұстап, елеусіз қалдырмайды, мұның бір дәлелі ретінде бүгінгі марапатты айтуға әбден болады. Марапатты табыстау барысында Зәуреш Исабаева Жанар Таласоваға «Алтын алқа», Зүлфия Кәкенова мен Гүлзат Мұхиттановаға «Күміс алқа» табыс етті.
— Түн ұйқысын төрт бөліп, бір қолымен бесікті, бір қолымен әлемді тербеткен асыл аналарымызға баршамыз қарыздармыз. Сіздердің бүгінгі жеткен жетістіктеріңіз «әйел бақытының биік шыңы» екені сөзсіз. Отбасыларыңыз аман, шаңырақтарыңыз қашанда биік болсын,- деді Зәуреш Рамазанқызы өз құттықтауында.
Жеті баланың анасы Жанар Таласованың айтуынша, көп баланың анасы болу қаншалықты бақыт сыйласа, соншалықты мол төзім мен еңбекті талап етеді. Бүгінде алты ұл, бір қыз тәрбиелеп отырған Жанар Таласова елімізде ана мен балаға барлық жағдай жасалып жатқанын айтады.
Айкерім ҚИЫҚБАЙ, Семей қаласы
