Семейдегі Невзоровтар отбасы атындағы Шығыс Қазақстан облыстық бейнелеу өнері мұражайына Швеция Корольдігінің Қазақстандағы Төтенше және Өкілетті елшісі Кристиан Камилл арнайы келді. Швеция елшісі мұражайға швед суретшісі Туве Крабоның «Полигон-1» деп аталатын туындысын салтанатты түрде табыс етті.
Швеция Корольдігінің Қазақстандағы Елшілігінің қолдауымен 2015 жылы Астанадағы Қазақстан Республикасы Тұңғыш Президентінің мұражайында «Мәдениет арқылы тілдесу» атты халықаралық жоба аясында Туве Крабоның «Түзелмейтін қателік: алғашқы найзағай» тақырыбындағы жеке көрмесі ұйымдастырылған еді. Өткен жылы бұл көрме Семейде жалғасын тапты. Көрмеде Н.Ә.Назарбаевтың Жарлығымен жабылған Семей ядролық сынақ полигонының адамзатқа, қоршаған ортаға тигізген зардабын көрсетуге арналған жұмыстар сериясы ұсынылған еді. Қазіргі таңда ол көрме Астанадағы ҚР Тұңғыш Президентінің мұражайында сақтаулы. Ал мәртебелі мейманның арнайы әкелген туындысы аталмыш көрменің бір бөлшегі деуге болады. «Көбіне өз образдарымды әлеуметтік желіден аламын. Олардың басым бөлігі — адамзат трагедиясы мен экологиялық зардап шеккен орындар. Мен қазіргі қоғамдағы апатты оқиғалар ағымы адамзатты мейірімсіз ете ме деп қорқамын. Оларға қасірет әкелетін құбылыстар мен оқиғаларға жаңа, шынайы мән-мағына беретін жанашырлық пен түсіністік секілді сезімдерді бейнелеу өнері арқылы қайтарғым келеді»,- депті Туве Крабо былтырғы жылы Семейде өткен көрмесінде. «Полигон-1» туындысында 1949 жылғы 29 тамыздағы Семей ядролық сынақ полигонындағы ең алғашқы жарылыстың бейнесі берілген. Елші Кристиан Камиллдың айтуынша, Қазақстан мен Швеция елдерін етене жақындататын ортақ көзқарас бар, ол — ядролық қарусыз әлемді қолдауы.
— Нұрсұлтан Назарбаев біздің ел — Швециямен ынтымақтастықты дамытуға айрықша мән беріп келеді. Ядролық қарусыз әлем құру – біздің ортақ мақсатымыз. Қырық жыл бойы қасірет әкелген Семей ядролық сынақ алаңын жапқан Қазақстан Президентінің сындарлы саясатына, ядролық қарусыз әлемді құрудағы ұшан – теңіз еңбегіне құрметпен қараймыз, — деді Кристиан Камилл.
Шара соңында мұражай директоры Татьяна Стромская Швеция елшісіне алғысын айта келіп, мұражай қорына қосылған туындының орны бөлек екенін жеткізді.
Айкерім ҚИЫҚБАЙ, Семей қаласы.
