7 қазан күні Семей қаласының әкімі Ермак Сәлімов «Agro Portal» ЖШС бас директоры Әмір Щекарчимен, «Kazakh Invest» ҰК» АҚ ШҚО бойынша өңірлік директоры Мадина Байсалбаевамен, «Ертіс ӘКК» ҰК» АҚ активтер бөлімінің жетекшісі Станислав Ясинскиймен кездесті. Кездесу барысында ирандық инвестордың біздің қаламызда жаңа кәсіпорын ашу ісі талқыланды.
2015 жылы аталған ирандық компания Шығыс Қазақстан облысы әкімдігіне ет өңдеумен айналысатын комбинат құрылысын салуға инновациялық жоба ұсынған болатын. Аталған жоба іске асса, өңірдегі ауыл шаруашылығын дамытуға елеулі үлес қосылар еді. Алайда түрлі себептерге байланысты аяғына дейін жетпей, тоқтап қалған. Міне, сол іске Шығыс Қазақстан облысының әкімі Даниал Ахметов өзі араласып, облыс үшін маңызы зор ірі жоба қайта қолға алынбақшы.
«Kazakh Invest» компаниясы Шығыс Қазақстанда ағымдағы жылдың наурыз айында құрылған. Компания аймағымызда жұмыс істеуге ниетті шетелдік инвесторлардың бизнес — жоспарларынан бастап жобаның жүзеге асып, соңғы нүктесі қойылғанға дейінгі аралықтағы жұмысын жүргізуге көмектеседі. Аталмыш жобада «Kazakh Invest» инвестициялық және кедендік артықшылықтарды алуда ирандық инвесторларға серіктес саналады.
Екі жақты кездесу барысында қала әкімі Ермак Сәлімов жобаның сәтті жүзеге асуы Семей қаласы үшін ерекше маңызға ие екеніне тоқталды. — Комбинат іске қосылса, оның біз үшін де пайдалы тұстары көп. Ол жергілікті халықты жұмыспен қамтып қана қоймай, өңір дамуына да жаңа серпін берер еді. Комбинат тәулігіне 2000 бас ұсақ мал мен 400 бас ірі қара малының етін өңдеуге қауқарлы. Осының арқасында мал саны артып, бордақылау алаңдары көптеп салынатын болады. Мұның барлығы, түптеп келгенде, жаңа жұмыс орындарының ашылуына, халықтың әлеуметтік жағдайының жақсаруына көмектесері сөзсіз,- деді шаһар басшысы өз сөзінде.
Күні бүгінге дейін облыс әкімі Даниал Ахметов ирандық жобаға қатысты «Agro Portal» ЖШС өкілдерімен екі мәрте жұмыс кездесуін өткізген. Кездесу барысында жергілікті тиісті органдарға жобаның нәтижелі іске асуы үшін нақты тапсырмалар жүктеген болатын. Қала билігі алғашқы жұмыстарды бастауға дайын. Комбинаттың құрылыс жұмыстары үшін жасалатын жобалық–сметалық құжаттама мен өзге де құжаттарды әзірлеу, темір жол тұйығы құрылысын салу, жарық, су, жылу желілерін тарту мәселелері бойынша жобаларды талқылау жүргізілуде.
Ермек ИСАБАЕВ, «Семей таңы»
